Helena hrökk í gang og stelpurnar tryggðu sér silfur á fimmtu leikunum í röð

Íslenska kvennalandsliðið í körfubolta tryggði sér silfurverðlaun á Smáþjóðaleikunum í San Marinó eftir fimmtán stiga sigur á Lúxemborg í lokaleik liðsins á leikunum.

Ísland vann leikinn 59-44 en þetta var óopinber úrslitaleikur um silfrið þar sem Malta hafði þegar tryggt sér gullverðlaunin með sínum þriðja sigri í röð í gær.

Helena Sverrisdóttir minnti á sig og var með 21 stig, 7 fráköst og 7 stoðsendingar en Emelía Ósk Gunnarsdóttir var næststigahæst með 10 stig.

Íslenska liðið hafði ekki spilað í hálft ár fyrir þessa leiki á Smáþjóðaleikunum og lykilmenn eins og Helena Sverrisdóttir, Hildur Björg Kjartansdóttir og Sara Rún Hinriksdóttir hafa allar ekkert verið með liðinu í meira en fimmtán mánuði. Það sást vel á mjög slökum fyrsta leik en liðið hefur síðan spilað betur með hverjum leik.

Landsliðsfyrirliðinn Helena Sverrisdóttir lék ekki í tapinu á móti Möltu í fyrsta leik vegna meiðsla og klikkaði síðan á öllum átta skotum sínum utan af velli í öðrum leiknum á móti Kýpur.

Helena fann aftur á móti taktinn í dag þar sem hún hitti úr 5 af 9 skotum sínum og öllum sjö vítunum. Hún var að vinna sín fimmtu silfurverðlaun á Smáþjóðaleikunum í dag.

Keflvíkingurinn Emelía Ósk Gunnarsdóttir hefur staðið sig vel á mótinu en hún skoraði 10 stig í þessum leik sem var hennar fyrsti landsleikur í byrjunarliði.

Íslenska liðið komst í 9-0 í byrjun leiksins, var 13-9 yfir eftir fyrsta leikhlutann, vann síðan annan leikhlutann 18-10 og var tólf stigum yfir í hálfleik, 31-19. Íslenska liðið var síðan með gott tak á leiknum í seinni hálfleiknum og sigurinn var aldrei í mikilli hættu.

Atkvæðamestar í íslenska liðinu í leiknum:

Helena Sverrisdóttir 21 stig, 7 stoðsendingar, 7 fráköst

Emelía Ósk Gunnarsdóttir 10 stig

Sara Rún Hinriksdóttir 6 stig, 6 fráköst

Sigrún Sjöfn Ámundadóttir 5 stig, 10 fráköst

Hildur Björg Kjartansdóttir 5 stig, 8 fráköst

Berglind Gunnarsdóttir 5 stig

Sandra Lind Þrastardóttir 5 stig

Thelma Dís Ágústsdóttir 2 stig

Íslenska kvennalandsliðið á Smáþjóðaleikum í gegnum tíðina:

1989 á Kýpur - silfurverðlaun (Lúxemborg vann gull)

1991 í Andorra - bronsverðlaun (Lúxemborg vann gull)

1993 á Möltu - silfurverðlaun (Lúxemborg vann gull)

1995 í Lúxemborg - silfurverðlaun (Lúxemborg vann gull)

1997 á Íslandi - gullverðlaun

2003 á Möltu - bronsverðlaun (Malta vann gull)

2005 í Andorra - silfurverðlaun (Lúxemborg vann gull)

2009 á Kýpur - silfurverðlaun (Malta vann gull)

2013 í Lúxemborg - silfurverðlaun (Lúxemborg vann gull)

2015 á Íslandi - silfurverðlaun (Lúxemborg vann gull)

2017 í San Marínó - silfurverðlaun (Malta vann gull)

Samantekt hjá íslenska kvennalandsliðinu:

Gull - 1 - (1997)

Silfur - 8 - (1989, 1993, 1995, 2005, 2009, 2013, 2015, 2017)

Brons - 2 - (1991, 2003)

Flest gullverðlaun:

7 - Lúxemborg (1989, 1991, 1993, 1995, 2005, 2013, 2015)

3 - Malta (2003, 2009, 2017)

1 - Ísland (1997)