Jake Paul lofar að hætta í hnefa­leikum ef hann tapar fyrir Doumbe

Paul mun mæta Doumbe í viðurkenndum tíu lotu bardaga í léttþungavigt 24. desember í Dúbaí í Sameinuðu arabísku furstadæmunum. Þetta verður fyrsti bardagi hins 29 ára gamla Pauls síðan hann kjálkabrotnaði þegar hann var rotaður af Anthony Joshua í desember í fyrra.

„Ef hann vinnur legg ég hanskana á hilluna og læt þetta gott heita,“ sagði Paul í myndbandi sem birtist á YouTube-rás hans. 

„En ef hann tapar, þá verður maðurinn sem kallar sig „þann besta“ barinn í klessu af YouTube-stjörnu með títankjálka. Svo, Cedric Doumbe – ég, Jake Joseph Paul, mun rota þig, niðurlægja þig og sigra þig á aðfangadag. Þessi bardagi fer ekki allar loturnar og einhver verður svæfður í Mið-Austurlöndum, og það er ekki jólasveinninn,“ sagði Paul.

Doumbe, sem er frá Frakklandi, er fyrrverandi heimsmeistari í sparkboxi og með 6-1 feril sem atvinnumaður í blönduðum bardagaíþróttum. Hann hefur aðeins einu sinni keppt í hnefaleikum sem atvinnumaður og fagnaði þá sigri árið 2015. Hinn 34 ára gamli Doumbe hefur ekki keppt í neinni bardagaíþrótt síðan í maí 2024.

Paul viðurkenndi að hann hefði íhugað að hætta á síðasta ári í kjölfar kjálkameiðslanna, sem kröfðust nokkurra skurðaðgerða í desember og febrúar.

„Satt best að segja, eftir Joshua hugsaði hluti af mér um að hætta og keppa aldrei aftur í hnefaleikum,“ sagði Paul. 

„Hann braut á mér kjálkann. Ég er með tvær títanplötur í munninum. Ég gat ekki borðað í margar vikur. Ég gat ekki einu sinni talað eða brosað að bankayfirlitunum mínum. Ég lá bara í rúminu kvöld eftir kvöld og spurði sjálfan mig: „Vil ég enn þá gera þetta?“ Já, auðvitað vil ég enn þá gera þetta. Ég er enginn aumingi.“