Ein­mana á botninum í hléinu

Selfoss er með eitt stig eftir fyrstu níu umferðirnar og nú er orðið langt í næstu lið því HK kom sér úr næstneðsta sætinu og er með sex stig líkt og Fram, Þór og Víkingur sem situr í 7. sæti. Stjarnan er núna næstneðst með fimm stig.

Næstu leikir í deildinni eru ekki fyrr en 12. nóvember, vegna landsleikja, og því þurfa Selfyssingar að bíða með að geta svarað fyrir sig.

Þeir voru 16-10 undir eftir fyrri hálfleik í Kórnum í kvöld og í seinni hálfleik var alltaf ljóst hvort liðanna færi með sigur af hólmi. Munurinn varð mestur þrettán mörk.

HK-ingar dreifðu mörkunum vel á milli sín en þeir Kári Tómas Hauksson og Andri Þór Helgason urðu markahæstir með sjö mörk hvor og þeir Alex Máni Oddnýjarson og Örn Alexandersson skoruðu fimm hvor. Þá varði Brynjar Vignir Sigurjónsson afar vel í markinu eða 38% samkvæmt HB Statz.

Ragnar Hilmarsson varð markahæstur hjá Selfossi með fimm mörk og Anton Breki Hjaltason og Tryggvi Sigurberg Traustason skoruðu fjögur mörk hvor.