Gylfi tekur við Víkingi

Gylfi skrifaði undir tveggja ára samning við Víking en félagið greindi frá ráðningunni í dag. Hann tekur við af Einari Guðnasyni sem var sagt upp í Víkinni í miðri viku í kjölfar þess að liðið féll úr Bestu deild kvenna í haust.

Gylfi kemur frá Grindavík/Njarðvík sem hann þjálfaði í tvö ár. Á fyrra árinu kom hann liðinu upp í Bestu deildina og það hélt sæti sínu örugglega í deild þeirra bestu í ár. Grindavík/Njarðvík fór jafnframt í bikarúrslit í ár en tapaði þar fyrir Þrótti.

„Gylfi hefur sýnt að hann býr yfir hæfni til að byggja upp lið, þróa unga leikmenn og skapa sterka liðsheild,“ segir í yfirlýsingu Víkings þar sem segir jafnframt:

„Ráðning Gylfa markar mikilvægt skref í þeirri vegferð og ríkir mikil ánægja innan knattspyrnudeildarinnar með að hafa tryggt krafta hans til næstu tveggja ára.“