Dimma búin að fylla í skarð Stebba Jak

Hljómsveitin greinir frá þessu í tilkynningu á samfélagsmiðlum.

„DIMMA snýr nú aftur tvíefld, með nýja liðskipan og nýtt lag sem ber heitið Skarkali!

Lagið er það fyrsta sem heyrist frá DIMMU í 5 ár og gefur hugmynd um hverju fólk má eiga von á frá sveitinni á sjöundu breiðskífu okkar, sem nú er í vinnslu og væntanleg á næsta ári,“ segir í tilkynningu.

Stefán Jakobsson, betur þekktur sem Stebbi Jak, hætti í sveitinni eftir fimmtán ára veru vegna ósættis við bassaleikarann Silla Geirdal og eiginkonu hans sem hann sagði að hefðu tekið afstöðu gegn honum í dómsmáli þar sem hann var ákærður fyrir líkamsárás og síðar sýknaður. 

Silli og kona hans höfnuðu þeim ásökunum og sögðust hafa reynt að koma á sáttum í málinu þar sem báðir aðilar dómsmálsins tengdust þeim böndum. Það hefði ekki tekist og samstarfið því sprungið.

Nýjasti meðlimur sveitarinnar er söngvarinn Ivan Mendez sem er ættaður frá Kólombíu og hefur gefið út tónlist undir eigin nafni síðustu ár. Einnig er trommarinn Skúli Gíslason ný viðbót en hann kemur í stað Birgis Jónssonar. Bræðurnir Silli Geirdal bassaleikari og Ingó Geirdal gítarleikari eru fyrir í sveitinni.

Hægt er að hlusta á nýja lagið, „Skarkala!“, hér að neðan: