„Óum­flýjan­legt“ að sjúk­dómar blossi aftur upp vegna að­gerða Banda­ríkjanna

Donald Trump Bandaríkjaforseti skrifaði undir tilskipun um að bóluefni gegn mislingum, hettusótt og rauðum hundum verði nú að gefa í nokkrum skömmtum í stað eins áður. 

Sérfræðingar í lýðheilsu og faraldsfræði benda á að tilskipunin byggi ekki neinum vísindalegum rökum. Hún muni jafnframt grafa undan trausti á bóluefnum og rugla almenning.

Í grein sem þeir Tiago Correira og Martin McKee, prófessorar í lýðheilsu, og Gregg Gonsalves, prófessor í faraldfræði, skrifa í vísindairitið BMJ benda þeir á að mislingafaraldur geisi nú þegar í Bandaríkjunum, aldarfjórðungi eftir að þeim hafði verið útrýmt í landinu.

Faraldurinn hófst í fyrra en staðfest tilfelli eru þegar orðin fleiri nú en allt síðasta ár. Fræðimennirnir benda jafnframt á að hlutfall barna sem eru bólusett með MMR-bóluefninu fari fallandi um allt landið.

„Lærdómurinn af uppgangi mislinga í Bandaríkjunum er að það er ekki hægt að endurvekja traust eftir að smituðum tekur að fjölga og sjúkdómar sem hægt er að koma í veg fyrir láta aftur á sér kræla,“ skrifa þremenningarnir.

Robert F. Kennedy yngri, heilbrigðisráðherra Bandaríkjanna, hefur um árabil verið einn háværasti andstæðingur bólusetninga í heiminum. Hann hefur dreift upplýsingafalsi um öryggi þeirra og virkni sem ekki er á rökum reist.

Hann hefur í embætistíð sinni meðal annars látið rannsaka meint tengsl einhverfu og MMR-bóluefnisins sem voru hrakin fyrir margt löngu. Kennedy var á meðal þeirra sem dreiftu þeim samsæriskenningum fyrst án þess að fyrir því væri nokkur fótur.