Óttast kín­verska gervi­greind

Scott Bessent, fjármálaráðherra Bandaríkjanna, sagði í dag að til greina kæmi að beita Kínverja refsiaðgerðum vegna meints þjófnaðar á tækni hvað varðar gervigreind. Verið sé að rannsaka hvort nýjasta kynslóð gervigreindarmódela í Kína byggi á bandarískri tækni.

Kínverska fyrirtækið Moonshot AI gaf á dögunum út nýtt gervigreindarmódel sem ber heitið Kimi K3 og í kjölfarið fylgdu lækkanir á mörkuðum vestanhafs. Í grunninn er það rakið til þess að kínversk gervigreindarmódel eru hönnuð til að þurfa minni reiknigetu en þau bandarísku. Það er að hluta til vegna þess að Bandaríkjamenn hafa takmarkað aðgengi Kínverja að öflugustu tölvuflögunum.

Þrátt fyrir það er Kimi K3-módelið metið nánast á pari við módel eins og Claude Fable 5 frá Anthropic og GPT-5,6 Sol frá OpenAI, samkvæmt frétt Wall Street Journal.

Svipaðar hreyfingar áttu sér stað á mörkuðum vestanhafs í janúar í fyrra þegar kínverska fyrirtækið Deepseek gaf út nýtt gervigreindarmódel. Bandarísku fyrirtækin jöfnuðu sig þó í kjölfarið og gott betur.

Þá takmarkaði þing Bandaríkjanna þó notkun Deepseek í opinberum kerfum. Var það gert á grunni öryggis og áhyggja af notkun persónuupplýsinga.

Sjá einnig: Gervigreind fyrir klink veldur Bandaríkjamönnum hausverk

Forsvarsmenn OpenAI og Anthropic vinna nú að því að setja félögin á markað.

Töluverð eftirspurn hefur verið eftir kínverskri gervigreind en ABC News sögðu frá því að forsvarsmenn Moonshot hefðu þurft að takmarka fjölda áskrifenda vegna eftirspurnarinnar, bæði í Kína og erlendis.

Saka Kínverja um þjófnað

Forsvarsmenn Anthropic kvörtuðu yfir því við yfirvöld Bandaríkjanna fyrr í mánuðinum að kínversk fyrirtæki hefðu stolið tækni frá þeim. Bessent, áðurnefndur fjármálaráðherra, sagði í sjónvarpsviðtali í dag að vísbendingar hefðu fundist sem bentu til þess að kínversku gervigreindarmódelin byggðu á bandarískri tækni. Það væri nú til rannsóknar og reyndist það rétt væri það algerlega óásættanlegt.

Sjá einnig: Gruna að DeepSeek byggi á gögnum ChatGPT

Bæði Anthropic og OpenAI hafa lengi verið sökuð um þjófnað, þar sem mállíkön fyrirtækjanna byggja að miklu leyti á bókum og öðrum rituðum orðum sem hafa verið notuð til að þjálfa gervigreindarmódelin.

Þá sagði Reuters frá því að erindrekar ríkjanna tveggja myndu funda sérstaklega um gervigreind í september. Bessent mun leiða bandarísku sendinefndina þá.