Stjörnur Sixers reyna að freista LeBron

Eftir að ljóst var að hinn 41 árs LeBron myndi ekki framlengja samning sinn við Los Angeles Lakers hefur ekki vantað framboðið af vangaveltum um framtíð hans í NBA.

ESPN greinir nú frá því að helstu stjörnur Sixers leggist nú á eitt til að fá LeBron til liðsins. Joel Embiid, Jaylen Brown og Tyrese Maxey hafa allir rætt við LeBron en sá síðarnefndi hefur látið mest að sér kveða í þessum efnum. Maxey og LeBron eru báðir á mála hjá umboðsskrifstofunni Klutch og hafa æft saman á sumrin.

Sixers fékk Brown frá Boston Celtics í skiptum fyrir Paul George á dögunum og vonast nú til þess að landa LeBron.

Á síðasta tímabili vann Sixers 45 leiki í deildarkeppninni en féll úr leik fyrir New York Knicks í undanúrslitum Austurdeildarinnar, 4-0. Sixers hefur ekki orðið NBA-meistari síðan 1983 og ekki komist í úrslit um meistaratitilinn síðan 2001.

Fyrir utan árin átta hjá Lakers hefur LeBron ávallt leikið í Austurdeildinni, með Cleveland Cavaliers og Miami Heat. Hann hefur verið orðaður við bæði lið eftir að ljóst var að hann myndi yfirgefa Lakers.

Á síðasta tímabili var LeBron með 20,9 stig, 6,1 fráköst og 7,2 stoðsendingar að meðaltali í leik. Lakers féll úr leik fyrir Oklahoma City Thunder í undanúrslitum Vesturdeildarinnar, 4-0.