KSÍ ætlar ekki að láta gervi­greindina koma í stað starfs­fólks

Knattspyrnusamband Íslands gaf út færslu sem er jafnframt skrifuð af gervigreindarforriti um innleiðingu gervigreindar í starfsemi félagsins. Þar er markmiðið að spara tíma en samkvæmt KSÍ er tími stærsta áskorun í knattspyrnustarfsemi.

Markmið stefnu gervigreindar KSÍ er að hjálpa til við handavinnu og önnur tímafrek verk ásamt því að styðja við upplýsingavinnslu. Einnig er tekið fram að notkun gervigreindar á að vera örugg og á ekki að brjóta á persónuvernd og öryggisstefnu sambandsins.

Sambandið leggur áherslu á að gervigreindin komi ekki í stað starfsfólks heldur er hún einungis tól til að hjálpa við tímafrek verkefni. Mikilvægt verður að taka fram þegar gervigreindin er notuð og á hvaða hátt.

Óheimilt verður að setja viðkvæm gögn sem gætu brotið á persónuvernd eða eru trúnaðargögn í gervigreindarkerfi og bera starfsmenn ábyrgð á öllu sem kemur frá gervigreindinni.