Vikulöng jarðar­för Khameini hafin

Búist er við að á milli fimmtán og tuttugu milljónir manna verði viðstaddar jarðarfararathafnir Ayatollah en líkkista hans verður flutt á fimm staði í Íran og Írak. Líkamsleifar hans eru nú í Tehran, höfuðborg Írans, og verður síðan haldið til borgarinnar Qom. 

Þar mun háttsettur sjíaklerkur leiða útfararbæn í Jamkaran, sem er einn af táknrænustu trúarlegu stöðum landsins.

Jarðarförin heldur áfram í borgunum Najaf og Karbala í Írak og lýkur henni loks í Mashhad í Íran. Núna fyrsta daginn er lík hans í helstu mosku Tehran en í kringum kistu leiðtogans eru kistur þeirra sem létust einnig í árásum Ísraela og Bandaríkjamanna.

Að athöfnunum loknum verður Ayatollah jarðsettur í Imam Reza, grafhýsi áttunda imams sjía-íslams og mikilvægasta pílagrímastað Írans. Áfram verða haldnar athafnir í minningu hans í eitt ár eftir jarðsetninguna.

Enn eru ekki komin formleg endalok eftir árásir Ísraels og Bandaríkjanna á Íran. Samkvæmt umfjöllun BBC sagði Donald Trump Bandaríkjaforseti að írönsk yfirvöld gætu ekki beðið eftir því að undirrita vopnahléssamkomulag.

„Við gáfum þeim frí í viku fyrir jarðarför því við erum svo almennileg,“ sagði Trump.

Mojtaba, sonur Ayatollah, tók við stjórnartaumum landsins í kjölfar andláts föður hans. Hann hefur ekki sést opinberlega síðan hann tók við og segir BBC að spurningar séu uppi um heilsu hans.