Kristjana nýr fram­kvæmda­stjóri Saffran

„Það eru mikil forréttindi að fá tækifæri til að leiða fyrirtæki sem ég hef starfað hjá í átta ár. Við ætlum að efla enn frekar framboð af hollri og bragðgóðri fæðu úr besta fáanlega hráefni, framreiddri af teymi með metnað fyrir heilsu og vellíðan,“ segir Kristjana, framkvæmdastjóri Saffran, í tilkynningu. 

Þar kemur fram að í þau átta ár sem Kristjana hefur starfað hjá Saffran hafi hún gegnt lykilhlutverki í uppbyggingu félagsins, þróun rekstrar og daglegri stjórnun starfsstöðva fyrirtækisins. Áður starfaði Kristjana í heilsugeiranum sem þjálfari, verkefnastjóri og stjórnandi.

Hjá fyrirtækinu starfa um 80 manns á höfuðborgarsvæðinu og Akureyri.

„Kristjana hefur verið lykilmaður í uppbyggingu Saffran og þekkir reksturinn betur en flestir. Hún hefur sýnt framúrskarandi leiðtogahæfileika og er vel í stakk búin til að leiða næsta vaxtarskeið,“ segir Bjarni Gunnarsson, stjórnarformaður Saffran.

Með breytingunni færist Bjarni úr daglegri stjórnun félagsins yfir í hlutverk stjórnarformanns.