Ó­gleyman­legt kvöld í alla staði

Blaðamaður ræddi við Aaron um þetta kvöld en markmið hans var að skapa lúxusheim fyrir gesti sína. Veislan var haldin í Santé Reykjavík í Skeifunni og þemað var „Allt eða ekkert“, sem er mottó-ið hans Aarons.

„Ég vildi hafa Casino Royale þema og gestir fóru alla leið. Þetta var algjörlega ógleymanlegt kvöld og lúxusinn auðvitað í fyrirrúmi. Fólkið hjá Sante sá um að okkur liði eins og stórstjörnum, segir Aaron kíminn.

Í upphafi kvölds fengu gestir freyðivín og kavíar sem gaf strax tóninn fyrir kvöldið og glimmer og glæsileiki tóku sömuleiðis vel á móti þeim. DJ Mellí hélt uppi rosalegri stemningu allt kvöldið og það var svo verðmætt að eiga þessa stórkostlegu stund með mínum nánustu. Gleði og jákvæðni var algjörlega í fyrirrúmi,“ bætir Aaron brosandi við. 

Klæðaburður hans endurspeglaði þema kvöldsins.

„Ég tók á móti gestum í vínrauðum flauelsjakka við ögrandi gegnsæjan samfesting og hnéhá stígvél. Ég opnaði svo Dom Pérignon kampavínsflösku með sverði og það ætlaði allt að tryllast. Síðar um kvöldið skipti ég yfir í glitrandi blá og hvít föt og fór í þeim á skemmtistaðinn Auto á kampavíns-flöskuborð,“ segir þessi lúxuspési.

Kvöldið var þýðingarmikið fyrir Aaron en hann flutti til Íslands alla leið frá Filippseyjum í heimsfaraldrinum.

„Síðustu ár hafa verið stútfull af áskorunum og ég er stoltur af sjálfum mér fyrir seigluna. Ég hef sannarlega meiri trú á sjálfum mér núna en ég hafði fyrir nokkrum árum. Þegar ég flutti gat ég engan veginn ímyndað mér hvað framtíðin bæri í skauti sér. Þegar ég lít til baka núna er ég ótrúlega þakklátur fyrir allt sem hefur gerst. 

Ég er sérstaklega þakklátur fyrir foreldra mína, Marlene Angeline Soriano og Bonifacio Jr. Soriano, en þau hafa alltaf haft trú á sér. Þar sem ég er yngsta barnið þeirra áttu þau sérstaklega erfitt með að fylgjast með mér flytja hinum meginn á hnöttinn en í dag eru þau mjög stolt af mér,“ segir Aaron að lokum.

Hér má sjá myndir frá herlegheitunum: