Tryggvi úr leik þrátt fyrir góða frammi­stöðu

Bilbao Basket tók á móti Valencia í öðrum leik liðanna í 8-liða úrslitum spænsku úrvalsdeildarinnar í körfubolta. Fyrsti leikur liðanna endaði með minnsta mun en Valencia bar yfirhöndina 83-80. Það var því ljóst fyrir leik kvöldsins að Tryggvi og félagar þurftu á sigri að halda til þess að detta ekki úr leik.

Strax í byrjun sást að þetta væri erfiður róður fyrir Bilbao Basket þar sem Valencia mætti ákveðið til leiks. Í hálfleik leiddi Valencia með tíu stigum þar sem staðan var 47-37.

Lið Tryggva þurfti á sterkri byrjun í seinni hálfleik að halda til þess að missa ekki Valencia fram úr sér en hið öfuga gerðist. Bilbao Basket mætti einfaldlega ekki til leiks í þriðja leikhluta og skoraði liðið aðeins tólf stig í öllum leikhlutanum.

Í fjórða leikhluta batnaði frammistaða Bilbao Basket töluvert en það var einfaldlega of lítið, of seint og leikurinn endaði með sigri Valencia 88-71.

Tryggvi var aftakamestur í sínu liði þar sem hann skoraði tíu stig og tók tíu fráköst. Því miður voru liðsfélagar hans ekki að gera honum neinn greiða og var frammistaða annarra leikmanna liðsins döpur.