Albanir mót­mæla harð­lega fyrir­hugaðri milljarðamæringa­para­dís

Affinity Partners hefur í hyggja að byggja upp ferðamannaparadís fyrir milljarðamæringa á Sazan, stærstu eyju Albaníu, og þá munu framkvæmdirnar einnig ná til votlendis og strandsvæða sem eru innan skilgreinds þjóðgarðs.

Á svæðinu er meðal annars að finna ein af síðustu heimkynnum munksels í Miðjarðarhafinu, auk þess sem þar er að finna um 200 fuglategundir sem margar eru í útrýmingarhættu.

Stór hluti svæðisins er innan verndarsvæðis.

Þrátt fyrir þetta segja náttúruverndarsamtök málið hvorki hafa farið í nokkurs konar kynningu né liggi fyrir hvort það hafi farið rétta leið í kerfinu hvað varðar öflun leyfa.

Forsætisráðherrann Edi Rama, sem hlaut endurkjör í fyrra meðal annars með loforðum um að koma Albaníu inn í Evrópusambandið fyrir árið 2030, hefur varið framkvæmdina og segist staðráðinn í því að sjá til þess að hún nái fram að ganga.

Rama hefur talað mjög fyrir aukinni fjárfestingu í landinu.

Íbúar á nærliggjandi svæðum og víðar eru hins vegar ævareiðir eftir að vegum var skyndilega lokað, framkvæmdasvæði afgirt og vinnuvélar færðar á staðinn.

„Við höfum aldrei séð annað eins á vernduðum svæðum Albaníu,“ segir Aleksandr Trajce, framkvæmdastjóri Protection and Preservation of the Natural Environment in Albania (PPNEA). „Þetta er ekki bara fordæmalaust heldur virðast lög og regla ekki gilda lengur; það er ekkert tillit tekið til samfélagsins, til umhverfisins, engin leyfi... bara jarðýtur.“