Gáfu miðann sinn og misstu af Grinda­vík verða Ís­lands­meistari

Íslandsmeistaratitilinn unnu Grindvíkingar án tveggja lykilmanna í þeim Ólafi Ólafssyni og DeAndre Kane sem voru að kljást við meiðsli. 

Vitað var af stöðu þeirra í aðdraganda leiksins en stöðu þeirra haldið innan liðsins eins og hægt var. Ólafur og Kane hefðu geta beitt sér en ákveðið var að hlífa þeim.

„Ég vissi af þessu,“ sagði Ingibergur Þór Jónasson, fráfarandi formaður körfuknattleiksdeildar Grindavíkur í samtali við Val Pál Eiríksson íþróttafréttamann.

„Ég ræddi við Jóhann þjálfara og kíkti á æfingu tveimur til þremur dögum fyrir leik. Kíkti heim á Ólaf. Mín hugsun var sú að fyrst þeir geta spilað, af hverju setjum við þá ekki í búning því við vitum aldrei hvernig Stólarnir mæta. Það getur einhver meiðst í hinu liðinu. Jóhann þjálfari segir alltaf: „þetta var aldrei í hættu“ og með vissu tóku hann og Helgi þessa ákvörðun. 

Staðan á Ólafi og Kane kvissaðist út meðal einhverra stuðningsmanna Grindavíkur. Höggið gífurlegt og voru einhverjir sem sáu það ekki gerast að Grindavík gætu sótt sigur og Íslandsmeistaratitil í Síkið án þessara öflugu leikmanna. Einhverjir Grindvíkingar losuðu sig við sinn miða á leikinn.

„Ég hefði reynt að fylgja liðinu. Þú veist aldrei. Maður hefur séð ótrúlega hluti gerast. Ég finn bara til með fólkinu sem var komið með miða og frétti af þessu. Við reyndum að segja engum frá þessu. Margir gáfu miðann sinn. Það er auðvelt að reyna finna ódýra afsökun fyrir því að mæta ekki. Ég hef gert það sjálfur. Trúin. Þetta samfélag. Þetta sýnir að við getum allt. Unnum í gær á ótrúlegan hátt. 

Leikurinn var frábær af hálfu Grindvíkinga og sér í lagi Jeremy Pargo sem átti einn besta leik sem leikmaður hefur átt í úrslitaeinvígi efstu deildar í sögunni. 

Pargo skoraði alls 48 stig í leiknum sem er nánast einsdæmi í úrslitaeinvígi á Íslandi. Hann fór fyrir sínu liði frá upphafi og skoraði 22 stig í fyrsta leikhlutanum, þegar Grindvíkingar, sem léku án þriggja lykilmanna, bjuggu til bil sem Tindastóli tókst aldrei að brúa.

Pargo setti meðal annars niður tíu þrista í leiknum, sem er met í úrslitum í óframlengdum leik, og þar af var náðarhöggið sem hann veitti Tindastólsmönnum þegar hann jók muninn í 105-101 hálfri mínútu fyrir leikslok.