Með 40 blöðrur á fótunum og sefur ekki fyrir verkjum: „Brýtur mann á allan hátt“

„Það er einhver sjálfsagi og þrautseigja sem fær mann til að halda áfram. Það væri rosalega auðvelt að sleppa þessu bara og hætta en það er bara ekki til í mér held ég. Ég held alltaf áfram, sama hvað,“ segir Karlotta en hún var í beinni útsendingu frá Sofiu í Bítinu á Bylgjunni í morgun.

Hlaupið sem Karlotta keppir nú í er í almenningsgarði í Sofiu, þar sem hlaupinn er 785 metra hringur aftur og aftur. Hún hefur að meðaltali hlaupið 79 kílómetra á dag en mest hljóp hún fyrsta daginn eða tæpa 115 kílómetra. En hversu erfitt er það andlega að hlaupa alltaf sama hringinn, svona lengi?

„Þetta brýtur mann á allan hátt. En þetta styrkir mann líka einhvern veginn sem er líklega ástæðan fyrir því að hér eru fjörutíuogeitthvað manns að hlaupa þetta, og margir að gera þetta í fjórða, fimmta eða sjötta sinn,“ segir Karlotta.

„Ég er að gera þetta í fyrsta sinn og er búin að læra ótrúlega mikið af þessum meisturum sem eru hérna. Hér eru nánast allir heimsmeistarar í þessum hlaupum og ég hef lært ótrúlega mikið. Mér fannst líka áhugavert að verða fyrsti Íslendingurinn til að keppa í tíu daga hlaupi og setja þannig Íslandsmet í tíu daga hlaupi,“ bætir hún við.

Karlotta hefur ítrekað sett Íslandsmet í ofurhlaupum síðustu misseri, þar af tvö í yfirstandandi keppni, en hennar lengsta hlaup þar til nú var sex daga hlaup í ágúst í fyrra, þegar hún fór 534 kílómetra og setti þá met. Hún ræddi einmitt við Vísi í október síðastliðnum og fór yfir árangurinn.

Spurningin er hve langt Karlotta nær í Sofiu en ljóst er að síðustu dagarnir verða hrikalega erfiðir:

„Ég veit ekki hvort ég næ 800 kílómetrum, ég átti frekar slæman dag í gær. Ég er komin með svo rosalega illt í hnén, er örugglega með svona 40 blöðrur og er núna bara í inniskóm. Ég fékk smánudd og sjúkraþjálfari skoðaði mig í morgun, en ég gat bara ekkert sofið í alla nótt fyrir verkjum í hnjánum. Þannig að ég er alveg svefnvana,“ segir Karlotta en nánar er rætt við hana í spilaranum hér að ofan.