Kort­leggja ferðir tuga sem fóru frá borði eftir að sá fyrsti dó

Vitað er til þess að fyrsta fólkið sem sýndi einkenni heimsótti staði þar sem talið er að finna megi rottur sem geta borið hantaveiruna.

Enn er óljóst hve margir fóru frá borði á St. Helenu en hollenska fyrirtækið sem gerir skemmtiferðaskipið út segir þá 29. Yfirvöld í Hollandi hafa sagt um fjörutíu, samkvæmt AP fréttaveitunni.

Ekki varð ljóst að hantaveira hefði verið í dreifingu um borð í skipinu fyrr en 2. maí. Þann dag dó ein kona til viðbótar um borð í skipinu en lík hennar er enn þar.

Alls hafa þrír dáið vegna veirunnar og er talið að að minnsta kosti átta til viðbótar hafi smitast. Skipinu er nú siglt í átt að Kanaríeyjum, þar sem stendur til að flytja fólkið frá borði og til heimaríkja sinna.

Sjá einnig: Þrír fluttir til Hollands og hantaveiruskipið á leið til Tenerife

Rúmlega 140 manns eru um borð í skipinu, bæði farþegar og áhöfn. Þrír farþegar og læknir voru fluttir af skipinu í gær.

Tedros Ghebreyesus, yfirmaður Alþjóðaheilbrigðismálastofnunarinnar, sagði á blaðamannafundi í dag að enginn sem væri enn sýndi einkenni. Hann sagði þó að meðgöngutími veirunnar væri allt að sex vikur. Það er að segja að allt að sex vikur geta liðið frá því fólk smitast og þar til það byrjar að sýna einkenni.

Búið er að hafa samband við alla sem fóru frá borði í á St. Helenu en það var þann 24. apríl síðastliðinn. Samkvæmt frétt Reuters er fólkið frá tólf ríkjum og þar á meðal sjö frá Bretlandi og sex frá Bandaríkjunum.

Ein af þeim þremur sem dóu var kona frá Hollandi, áðurnefnd kona mannsins sem dó fyrst, en forsvarsmenn flugfélagsins KLM sögðu frá því í gærkvöldi að henni hefði verið vísað úr flugvél á þeirra vegum í Suður-Afríku þann 25. apríl vegna heilsu hennar.

Hún dó áður en hún komst til Hollands en flugfreyja úr þessari flugvél hefur verið lögð inn á sjúkrahús vegna veikinda og gruns um að hún hafi smitast af hantaveirunni, samkvæmt fréttum hollenskra miðla.

Hantaveira smitast yfirleitt í menn sem anda að sér gufum frá hægðum smitaðra nagdýra. Það afbrigði veirunnar sem fólkið hefur smitast af smitast sjaldan manna á milli og segja sérfræðingar að mikla nánd þurfi til.

Á blaðamannafundi WHO í dag kom fram að vitað sé til þess að hjónin sem dóu fyrst hafi heimsótt staði í Ástralíu þar sem vitað er að finna megi tegundir rotta sem geti borið hantaveiruna. Unnið er með yfirvöldum þar að því að kortleggja ferðir hjónanna betur en þau ferðuðust einnig til Síle og Úrúgvæ.

Órói á Kanaríeyjum

Íbúum á Kanaríeyjum er mörgum ekki rótt vegna þess að verið sé að sigla skipinu þangað. Margir eru sagðir óttast útbreiðslu veirunnar þar. Ghebreyesus sagði á blaðamannafundi í dag að fólki á Kanaríeyjum stafaði mjög lítil hætta af veirunni.

Fernando Clavijo, hæst setti embættismaður Kanaríeyja, hefur lýst því yfir að hann sé andvígur því að skipinu verði siglt þangað. Hann er pólitískur andstæðingur Pedros Sanchez, forsætisráðherra Spánar.