„Um leið og ég sá hann fara ofan í fór mér að líða betur“

Kári mætti í viðtal til Andra Más strax eftir leik sem bað Kári um að greina það hvar sigurinn varð til í leik sem var afar jafn í fyrri hálfleik.

„Við náðum fínu áhlaupi um miðbik seinni hálfleiks. Settum nokkur skot og náðum stoppum. Bjuggum til smá mun sem við náðum að halda út í þetta skiptið.“

Það var jafnt á öllum tölum í fyrri hálfleik, staðan 41-41, og Kári var alls ekki sáttur með spilamennsku liðsins fyrstu 20 mínúturnar.

„Ekki gott! Svona ef ég á að segja alveg eins og er. Við vorum ekki góðir í fyrri hálfleik. Við vorum ekki að gera nógu vel í því sem við ætluðum að gera. Við vorum ekki nógu sáttir og eiginlega bara heppnir að þetta var jafn leikur í hálfleik.“

Valsmenn hófu leik án Lazar Nicolic sem meiddist í síðasta leik og misstu svo Frank Aron Booker út af meiddan einnig í fyrri hálfleik. Kári var mjög sáttur með það hvernig Valsmönnum tókst að leysa úr þeirri stöðu og hrósaði Igor Maric sérstaklega, en Igor setti fjóra þrista í fjórum skotum í fyrri hálfleik.

„Bara mjög vel. Igor kemur geggjaður inn, sérstaklega í fyrri hálfleik. Menn stíga upp og gera betur og eru tilbúnir að bakka upp hvern annan.“

Kári var sjálfur stigalaus í fyrri hálfleik en endaði með 16 stig, stigahæstur Valsmanna ásamt Callum Lawson.

„Ég hélt bara áfram að vera aggressívur og skjóta boltanum. Um leið og ég sá hann fara ofan í fór mér að líða betur og það fóru fleiri ofan í, sem betur fer!“

Grindvíkingar klóruðu aðeins í bakkann undir lokin en Kári sagði að það hefði ekki valdið neinum skjálfta hjá Valsmönnum.

„Alls ekki sko. Við gerðum bara mjög varnarlega á þessum síðustu mínútum og líka sóknarlega. Vorum að fá góð skot í flestum sóknum. Við náðum að klára þetta núna, vorum svekktir með að klúðra þessu niður í síðasta leik en gerðum betur í dag.