Gunnar Nel­son í sjó­mann við mann sem hann átti að mæta í búrinu

Hjá SBG á Írlandi hittir Gunnar fyrir þjálfara sinn John Kavanagh sem er jafnframt þjálfari Conor McGregor, þekktasta bardagamanns UFC sambandsins en orðrómur er á kreiki um að nú styttist í endurkomu hans í búrið. 

Gunnar hefur verið í slagtogi með hóp suður-kóreskra bardagakappa á meðan á dvöl hans hefur staðið hjá SBG. 

Þeirra á meðal er Dong Hyun Kim sem er fyrsti bardagakappinn frá Suður-Kóreu til þess að komast á samning hjá UFC. 

Á einni æfingu sinni hjá SBG ákváðu Gunnar og Kim að taka eina viðureign í sjómann. Myndband af viðureigninni birtist á samfélagsmiðlareikningi Kim og má sjá að hart var barist. Viðureignin endaði þó með sigri Gunnars og höfði kapparnir gaman af þessu. 

Vel fer á með Gunnari og Kim en þeir áttu að mætast í bardagabúrinu árið 2016. 

Gunnar meiddist hins vegar í aðdraganda bardagans og ekkert varð af honum. 

Um stund virtist anda köldu á milli þeirra því í frétt sem birtist á Vísi árið 2017 er greint frá því að Kim hafi talið Gunnar fá sérmeðferð hjá UFC þar sem hann væri í liði með Conor McGregor. 

Ekki er annað að sjá en að Gunnar sé í hörku standi en í samtali við Vísi í mars sagðist hann vera með augun á bardaga í ár. 

Gunnar átti að mæta Neal Magny í bardagabúrinu síðasta sumar en þurfti að draga sig úr þeim bardaga vegna meiðsla.

Gunnar barðist síðast fyrir um ári síðan og tapaði þá á einróma dómaraúrskurði gegn Kevin Holland en fyrir þann bardaga hafði Gunnar unnið tvo bardaga í röð.