Ballið búið hjá Húrra Reykja­vík

„Eftir langa og eftirminnilega vegferð höfum við tekið þá erfiðu ákvörðun að loka Húrra og versluninni okkar við Hverfisgötu í lok apríl. Það er erfitt að kveðja eitthvað sem hefur verið svona stór hluti af lífi okkar en allt hefur sitt upphaf og endi,“ segir í færslu þess efnis á Facebook-síðu verslunarinnar.

Húrra Reykjavík var stofnað árið 2014 á Hverfisgötu og síðar voru opnuð útibú víðar, í Smáralind, Kringlunni og Leifsstöð. Svo virðist sem halla hafi farið undan fæti undanfarið en í mars var greint frá því að ákveðið hefði verið að loka útibúunum í Smáralind og Kringlunni og þá hafði útibúinu í Leifsstöð þegar verið lokað.

„Næstu vikur verða þær síðustu í Húrra sögunni. Verslunin verður opin á meðan birgðir endast og hvetjum við alla til að kíkja við, versla eitthvað fallegt í síðasta sinn og kveðja þannig Húrra Reykjavík með stæl. Allar vörur verða á helmings afslætti. Við viljum nýta tækifærið til að þakka öllum þeim sem hafa lagt leið sína í verslunina í Húrra í gegnum árin. Stuðningurinn, tryggðin og velvildin er það sem hefur haldið okkur gangandi allan þennan tíma,“ segir í Facebook-færslunni.