Finnur Freyr komst loksins fram úr Frið­riki Inga

Finnur og lærisveinar hans fóru þá til Keflavíkur og náðu að jafna einvígið sitt í átta liða úrslitum Bónusdeildar karla með fimm stiga sigri, 87-82.

Finnur var búinn að bíða nokkuð lengi eftir þessum metsigri því Valsliðið var búið að tapa fjórum leikjum í röð í úrslitakeppni frá því að hann jafnaði við Friðrik Inga Rúnarsson með sigri á Grindavík í fyrsta leik átta liða úrslitanna í fyrra.

Grindavík vann næstu þrjá leiki og sendi Val í sumarfrí. Valsmenn töpuðu svo á heimavelli í fyrsta leiknum í einvíginu á móti Keflavík.

Friðrik Ingi vann á sínum tíma 74 leiki í úrslitakeppni í þeim 132 leikjum sem hann stýrði en það gerir 56 prósenta sigurhlutfall. Friðrik vann leikina 74 með þremur félögum eða Njarðvík (35), Grindavík (33) og Keflavík (6).

75. sigurleikur Finns kom í leik númer 108 og hann er því með 69 prósent sigurhlutfall sem þjálfari í úrslitakeppni. Hann hefur unnið þessa leiki sem þjálfari KR (45) og þjálfari Vals (30).

Finnur Freyr á þegar metið yfir flesta Íslandsmeistaratitla í úrslitakeppni en þeir eru sjö talsins, fimm með KR og tveir með Val.

Friðrik Ingi gerði þrjú félög að Íslandsmeisturum, Njarðvík 1991 og 1998 og svo Grindavík 1996.

Sigurður Ingimundarson er í öðru sæti í titlum með fimm Íslandsmeistaratitla sem þjálfari Keflavíkurliðsins en hann er í þriðja sæti í sigurleikjum með 68 talsins í 116 leikjum sem gerir 59 prósenta sigurhlutfall.