At­vinnu­leysi 7,1 prósent í febrúar

Alls voru 75 prósent starfandi og atvinnuþátttaka 80,8 prósent samkvæmt nýjustu tölum frá Hagstofu Íslands. Hlutfall starfandi lækkaði um 0,8 prósent og atvinnuþátttaka minnkaði um 0,6 prósentustig.

Í tilkynningu frá Hagstofunni segir að forsendur fyrir úrvinnslu vinnumarkaðsrannsóknarinnar hafi breyst þar sem svörun þátttakenda hefur aukist umtalsvert. Sér í lagi hefur svarhlutfall innflytjenda farið úr sautján prósentum að jafnaði síðastliðin tvö ár í tæplega 41 prósent.

Ef tölurnar eru ekki árstíðarleiðréttar mælist atvinnuleysið 7,9 prósent og fjöldi atvinnulausra 18.400. Hlutfall starfandi var 72,8 prósent sem samsvarar tæplega 213.300 einstaklingum.