Reglur sem lands­byggðar­lið vildu og Þór þarf að greiða hundruð þúsunda

Ólafur Torfason, stjórnarmaður hjá Þór, útskýrði ákvörðun Þórsara um að ferðast ekki suður í leikinn í pistli á Facebook í gær. Hann benti á að öllu flugi hefði verið aflýst vegna veðurs og að þó að heiðarnar væru opnar væri víða óveður á leiðinni suður.

„Staðan er því þannig að það er algjörlega óviðunandi að senda mína leikmenn út í óvissuna um hvort þær komist á leiðarenda til að spila sinn leik og með óvissu um hvenær þær komist til baka með tilheyrandi kostnaði fyrir félagið,“ skrifaði Ólafur.

Stjórn körfuknattleiksdeildar Þórs sendi auk þess frá sér yfirlýsingu í gær og kvaðst „harma þau viðbrögð sem við fengum í þessu máli og það sem við upplifum sem algeran skort á skilningi á alvarleika aðstæðna og ábyrgð gagnvart öryggi leikmanna. Við stöndum engu að síður heilshugar við þá ákvörðun sem tekin var. Þó hún kunni að hafa í för með sér afleiðingar fyrir félagið erum við sannfærð um að hún hafi verið rétt og nauðsynleg miðað við þær aðstæður sem uppi voru.“

Ljóst er að Þór þarf að greiða að lágmarki 300.000 krónur í sekt vegna málsins en endanleg upphæð ræðst á útreiknuðum ferðakostnaði. KKÍ fær 150.000 krónur af sektinni, samkvæmt reglugerð, en félagið sem átti að mæta Þór, Selfoss, fær upphæð sem nemur öllum ferðakostnaði á milli Akureyrar og Selfoss, að lágmarki 150.000 krónur. Þá er Selfossi úrskurðaður 20-0 sigur.

Í góðu sambandi við þar til bær yfirvöld

Vísir bar málið undir Hannes sem þá var á leiðinni ásamt formanni KKÍ, Kristni Albertssyni, til Hornafjarðar þar sem Sindri og Höttur mætast í kvöld í úrslitaleik um efsta sæti 1. deildar karla.

„Það var farið eftir vinnureglum mótanefndar og öllu því sem félögunum hefur verið kynnt. Það voru nokkur hundruð bílar sem keyrðu þarna í gegn í gær,“ sagði Hannes.

„Við vitum alveg að þetta er erfitt en aðalmálið er að þessar reglur voru settar að beiðni landsbyggðarliðanna á sínum tíma því það var svo mikið af liðum á höfuðborgarsvæðinu sem vildu bara ekki koma þegar það var eitthvað smá að veðrinu. Við erum í góðu sambandi við vegagerðina og þar til bær yfirvöld þegar við tökum svona ákvarðanir,“ sagði Hannes.

Hann bendir á að í dag þurfi til að mynda að fresta leikjum vegna veðurs.

„Það eru skýrar reglur um þetta og eftir þeim verður að fara þegar unnið er með mótahaldið. Við þurfum að fresta leikjum í dag og það er samkvæmt leiðbeiningum frá þar til bærum yfirvöldum.“