Segir Almari og fé­lögum sýnd hræði­leg van­virðing

Almar Orri er í stóru hlutverki í liðinu og var með 16 stig, 3 fráköst og 2 stoðsendingar á 27 mínútum í dramatískum endurkomusigri á Western Michigan Broncos í síðasta leik.

Flestum að óvörum þá er Miami-háskólinn í aðalhlutverki í umræðunni nú þegar styttist í að Marsfárið fari af stað. Ein af þjálfaragoðsögnum háskólakörfuboltans gefur ekki mikið fyrir árangur Almars og félaga í vetur.

Bruce Pearl, fyrrverandi þjálfari Auburn og nú sjónvarpslýsandi, sagði að ósigraðir Miami-strákar ættu ekki skilið sæti í NCAA-úrslitakeppni karla án sjálfkrafa þátttökuréttar.

„Þú hefur alrangt fyrir þér varðandi Miami þegar þú segir að við myndum enda neðstir í Big East-deildinni,“ skrifaði David Sayler, íþróttastjóri Miami, á samfélagsmiðlinum X. „Vanvirðingin er hræðileg og þú ættir ekki að koma nálægt sjónvarpsveri að fjalla um þessa íþrótt þegar þú sýnir þitt rétta andlit,“ skrifaði Sayler.

„Þeir eru ekki byggðir fyrir álagið í Big Ten-deildinni eða jafnvel Big East. Í Big East-deildinni á þessu ári myndu þeir enda í neðri helmingnum,“ sagði Pearl við Barstool á mánudag. „Þeir myndu kannski ekki enda neðstir. En ég skal segja þér: Ég er ekki svo viss. Ég er ekki svo viss. Hvert er liðið í neðsta sæti? Það væri DePaul. Það væri Marquette. Ég veit það ekki,“ sagði Pearl.

Miami er að skrifa söguna með aðeins tvo leiki eftir þar sem liðið reynir að ljúka venjulegu leiktímabili án þess að tapa. Á laugardag sagði Pearl, sem vinnur fyrir TNT-sjónvarpsstöðina, að Miami-skólinn yrði að vinna úrslitakeppni deildarinnar til að vinna sér inn sæti því þeir væru „ekki eitt af bestu liðum landsins.“

Pearl hætti hjá Auburn nokkrum klukkustundum áður en venjulegt leiktímabil hófst og skólinn tilkynnti að sonur hans, Steven, yrði nýr þjálfari þessi. Liðið hefur tapað sjö af síðustu átta leikjum sínum, sem er niðursveifla sem gæti stefnt vonum liðsins um þátttöku í NCAA-úrslitakeppninni í hættu.

Sayler sakaði Pearl um að ýta undir vonir Auburn um þátttöku í NCAA-úrslitakeppninni á kostnað Miami.

„Þessi maður á ekkert erindi nálægt sjónvarpsveri varðandi neitt sem tengist March Madness þegar hann segir svona hluti,“ birti Sayler á X. „Vanvirðingin fyrir því sem liðið okkar er að afreka er ógeðsleg og ég mun ekki standa hjá og hlusta á það.“