Cristiano Ronaldo með á­hrifa­mikla kveðju til Lindsey Vonn

Vonn hefur verið að segja fylgjendum sínum frá martröð sinni eftir fótbrotið á Vetrarólympíuleikunum og öllum aðgerðunum sem hún hefur þurft að gangast undir síðan þá til að bjarga fæti sínum.

Vonn hlaut flókið fótleggsbrot í ljótri byltu í brunkeppni Ólympíuleikanna í Cortina d'Ampezzo sunnudaginn 8. febrúar. Það gerðist aðeins rúmri viku eftir að hún sleit krossband í byltu í Crans Montana.

Eftir byltuna á Ólympíuleikunum fór bandaríska ofurstjarnan í fjórar aðgerðir á sjúkrahúsinu í Treviso á Ítalíu áður en hún var flutt heim til Bandaríkjanna þar sem hún fór síðan í sex klukkutíma aðgerð.

Í myndbandi og texta sem birtur var á Instagram á mánudag segir Vonn nánar frá þeim dramatísku atburðum sem hafa átt sér stað undanfarnar vikur.

Hún þakkar sérstaklega einum lækni.

„Dr. Tom Hackett bjargaði fætinum á mér frá aflimun. Hann bjargaði mér. Ég tala alltaf um að allt gerist af ástæðu og ef ég hefði ekki slitið krossbandið hefði Tom ekki verið þarna til að bjarga fætinum á mér. Ég er mjög þakklát,“ segir Vonn í myndbandinu.

Cristiano Ronaldo var virkur í athugasemdum við færslu Vonn og sendi henni áhrifamikil skilaboð.

„Meistarar eru skilgreindir út frá bæði sigurstundum þeirra en einnig þegar þeir neita að gefast upp. Fjöllin sem þú klefist og voru aldrei hærri en styrkurinn sem þú býrð yfir innanbrjósts. Haltu áfram að berjast. Goðsagnir standa alltaf upp,“ skrifaði Ronaldo.

Lindsey Vonn svaraði kveðjunni eins og sjá má líka með því að fletta myndinni hér fyrir neðan.

„Það að þetta komi frá þér skiptir mig miklu máli,“ skrifaði Vonn.