Vonn svarar fyrir sig: „Sveið þegar fólk sagði að ég væri eigin­gjörn“

Vonn keppti á Vetrarólympíuleikunum í Mílanó og Cortina þrátt fyrir að vera nýbúin að slíta krossband í hné.

Vont varð verra fyrir Vonn því hún datt í brautinni í brunkeppninni og fótbrotnaði illa. Hún hefur gengist undir alls fimm aðgerðir vegna meiðslanna.

Eitthvað hefur borið á gagnrýni á að hin 41 árs Vonn hafi tekið þátt á Vetrarólympíuleikunum en ekki gefið sæti sitt eftir til yngri keppanda sem var heill heilsu. Vonn svaraði fyrir þessa gagnrýni í færslu á Instagram í dag.

Á minningarnar að eilífu

„Þetta var ekki allt til einkis. Þetta var allt og þetta var ekki draumur þótt þetta virðist fjarlægt þegar ég sit í þessu sjúkrarúmi núna,“ skrifaði Vonn.

„En ég gerði þetta. Ég kom til baka. Ég vann. Ég mætti og gerði það sem flestir töldu ómögulegt fyrir mig á þessum aldri og með hnéð í þessu ásigkomulagi. Ég mun eiga þessar minningar að eilífu og ég er þakklát fyrir hverja eina og einustu þeirra. Hvert augnablik var stórkostlegt. Hvert augnablik var þess virði.“

Skilja ekki hvað það er að vinna fyrir einhverju

Vonn segir að hún hafi átt fullan rétt á því að keppa á Vetrarólympíuleikunum.

„Eitt af því sem sveið var þegar fólk sagði að ég væri eigingjörn og ætti að eftirláta öðrum Ólympíusætið mitt. Svo ég vildi bara fara yfir tímabilið fyrir alla hælbítana sem skilja ekki hvað það er að vinna fyrir einhverju,“ skrifaði Vonn en með færslunni eru helstu afrek hennar á tímabilinu tíunduð, í máli og myndum.

„Það er ekki ómögulegt fyrr en það hefur verið gert. Ég náði ekki mínu helsta markmiði en ég gerði margt. Ég þakka þeim sem trúðu.“

Vonn er ein sigursælasta skíðakona allra tíma. Hún varð fyrsta bandaríska konan til að vinna til gullverðlauna í bruni á Vetrarólympíuleikunum í Vancouver 2010.