Einn stofn­enda ASOS fannst látinn

Breskir fjölmiðlar greina frá andláti Griffiths í dag. Hann var í hópi stofnenda tískunetverslunarinnar ASOS árið 2000 og hélt áfram að vera stór hluthafi í félaginu eftir að hann hætti þar störfum fimm árum eftir stofnun.

Í frétt BBC segir að lögregla í Pattaya í Taílandi hafi komið að Griffiths látnum 9. febrúar síðastliðinn. Hann hafi verið einn í herberginu á sautjándu hæð sem hafi verið læst innan frá. Engin merki hafi verið um innbrot og ekkert hafi bent til saknæms athæfis. Griffiths hafði búið á hótelinu um nokkurt skeið.

Lögregla í Taílandi segir í samtali við BBC að Griffiths hafi verið með tvö dómsmál hangandi yfir sér sem kunni að hafa valdið honum vanlíðan. Hann hafði nýverið skilið við seinni eiginkonu sína, taílenskan ríkisborgara, en þau hafi einnig átt í lagadeilum vegna fyrirtækis sem þau hafi rekið saman.

Griffiths stofnaði Asos í London með þeim Nick Robertson, Andrew Regan og Deborah Thorpe. Nafnið ASOS stóð upprunalega fyrir „As Seen On Screen“ og seldi tískufatnað sem svipaði til fatnaðar sem leikarar höfðu klæðst í kvikmyndum og sjónvarpsþáttum.

Fyrirtækið átti eftir að vaxa mikið og verða að einum af fataverslunarrisum heims. Félagið var um tíma metið á sex milljarða breskra punda.

Stærsti hluthafi ASOS er nú danski milljarðamæringurinn Anders Holch Povlsen sem á einnig verslunarrisann Bestseller og svo Mike Ashley, eiganda Frasers Group.