Skipta­stjóri Play kannar hvort Icelandair sé bóta­skylt vegna um­mæla starfs­manns

Þar af nema samþykktar forgangskröfur 1,1 milljarði en þeirra á meðal eru einna helst launakröfur fyrrverandi starfsmanna. Heildarkröfur eru um 1.700 talsins og drjúgur hluti kröfuhafa er erlendur. Ekki hefur verið tekin afstaða til almennra krafna. Þetta segir Arnar Þór Stefánsson, lögmaður og skiptastjóri þrotabús Play.

Meðal kröfuhafa sé fjöldi flugmiðahafa, einkum erlendra, og íslensk fyrirtæki sem hafi þjónustað flugfélagið.

„Þau fá ekkert að öllum líkindum. Við erum tæplega að fara að greiða nokkuð upp í almennar kröfur, þá þarf að finna til eignir sem ná þessum 1,1 milljarði. Það er afar ólíklegt eins og staðan er í dag. Við munum auðvitað reyna að hafa uppi á öllum eignum og verðmætum sem við getum og ég mun reyna það áfram.“

Arnar segir fjölda krafna frá flugmiðahöfum koma á óvart. Neytendur sem kaupi miða með greiðslukortum geti yfirleitt óskað eftir endurgreiðslu frá kortafyrirtæki ef keypt þjónusta sé ekki veitt. Þetta eigi þó síður við ef fólk hafi staðgreitt gjafabréf.

Úrskurðurinn komi á versta tíma

Arnar var útnefndur skiptastjóri þrotabúsins ásamt Unni Lilju Hermannsdóttur lögmanni en Héraðsdómur Reykjavíkur úrskurðaði hana vanhæfa í dag. Arnar gagnrýnir hversu langan tíma það tók að úrskurða í málinu þar sem krafan hafi komið fram í lok október. Mikilvægt hefði verið að fá skýra mynd af stöðu skiptastjóra miklu fyrr.

„Það er úrskurðað fyrst núna 18. febrúar, eiginlega á versta tíma af því að við vorum þarna í miðri afstöðutöku og fram undan er skiptafundur. Þannig að þetta er slæmur tímapunktur. En ég leysi þá bara úr þessu einn.“ Skiptafundur fer fram 27. febrúar.

Arnar segir að ekkert útlit sé fyrir að öðrum skiptastjóra verði bætt við nema Unnur kæri niðurstöðuna og verði úrskurðuð hæf af Landsrétti. Hann telur ekki þörf á öðrum skiptastjóra upp úr þessu þar sem tímafrek vinna á upphafsstigum sé að baki.

Meta hvort Play hafi orðið ógjaldfært löngu fyrr

Fram undan er að taka afstöðu til riftanleika á ráðstöfunum sem áttu sér stað í aðdraganda gjaldþrotsins, að sögn Arnars. 

Til að mynda verði skoðað hvort hægt sé að rifta greiðslum félagsins í aðdraganda þrotsins og reyna að fá þær endurheimtar inn í búið. Þetta geti átt við ef einhverjir kröfuhafar hafi fengið greitt umfram aðra þar sem jafnræði kröfuhafa sé meginregla við gjaldþrotaskipti.

Þá sé það hluti af næsta fasa að meta á hvaða tímapunkti Play varð ógjaldfært og skoða hvort það var orðið ógjaldfært vel fyrir gjaldþrot.

Skoða þurfi mögulega bótaskyldu Icelandair

Arnar segir einnig hægt að skoða áhrif skuldabréfaútboðsins sem tryggði Play fjármagn til skamms tíma og hvað hafi orðið um það fé. Rýna þurfi orsakir þrotsins, þar með talið þátt flugstjóra Icelandair sem var jafnframt formaður Félags íslenskra atvinnuflugmanna (FÍA).

„Það liggur til dæmis fyrir að formaður FÍA, sem hefur lengi verið starfsmaður Icelandair, fer í viðtal þarna snemma í september. Það hefur nú alveg komið fram hjá fyrrverandi forsvarsmönnum Play að við það hrynur sala flugmiða og kröfuhafar verða enn þá stressaðri þegar hann er með dómsdagsspár,“ segir Arnar.

Rýna þurfi hvort þessi háttsemi starfsmannsins feli í sér misnotkun á markaðsráðandi stöðu af hálfu Icelandair og bótaskyldu félagsins af þeim sökum gagnvart þrotabúinu.

Play sendi kvörtun til Samkeppniseftirlitsins þann 5. september 2025 vegna meintrar misnotkunar Icelandair á markaðsráðandi stöðu eftir að umræddur flugmaður spáði gjaldþroti félagsins í viðtali á Bylgjunni. 24 dögum síðar hafði Play hætt starfsemi.

„Þetta er eitt af því sem þarf að skoða,“ segir Arnar. Allt komi til greina og hann hafi sem skiptastjóri ákveðnar skyldur sem feli meðal annars í sér að sækja verðmæti.

„Ef það er einhver sem olli félaginu tjóni með bótaskyldum hætti þá á þrotabúið þá kröfu og hún rennur þá til kröfuhafa sem eign eftir reglum gjaldþrotaréttarins.“

Fréttin hefur verið uppfærð.