Eyddi öllu út beint eftir Ofurskálina

Ástæða þess að stórstjarnan hefur tæmt Instagram-reikning sinn eru ekki ljósar en samkvæmt umfjöllun E-online virðist sem hann hafi einnig hætt að fylgja þeim notendum miðilsins sem hann gerði áður. Enn er hann þó sjálfur með yfir fimmtíu milljónir fylgjenda á Instagram, sem eins og sakir standa nú geta lítið sem ekkert skoðað ef þeir heimsækja prófíl tónlistarmannsins. 

Bad Bunny sem er frá Púertó Ríkó skráði sig á spjöld sögunnar á sunnudaginn þegar hann flutti atriði sitt allt á móðurmálinu spænsku. Lady Gaga tók hins vegar eitt lag á ensku en sjálfur hélt Bad Bunny sig við spænskuna.

Óhætt er að segja að hann hafi stolið senunni en frægð hans hefur aðeins haldið áfram að rísa síðan hann tróð upp í hálfleik, þrátt fyrir neikvæð ummæli af hálfu þeirra sem voru ekki hrifnir af frammistöðunni, en þeirra á meðal eru Donald Trump Bandaríkjaforseti.