Skoraði tíu mörk í lífsnauðsynlegum sigri ÍR

Fyrir leik kvölsins sat ÍR á botni Olís deildarinnar með fimm stig og fimm stigum á eftir HK sem sat í síðasta örugga sæti deildarinnar, því tíunda. 

Jafnræði var með liðunum lengi vel í fyrri hálfleik en þegar líða tók á lokamínútur hans tókst heimamönnum í ÍR að byggja forskot sem stóð í fjórum mörkum, 19-15, þegar að flautað var til hálfleiks. 

Þeirri forystu héldu ÍR-ingar meira eða minna út leikinn, HK-ingar gerðu áhlaup þegar rétt tæpar tíu mínútur eftir lifðu leiks og komu forystu ÍR niður í tvö mörk í stöðuna 31-29 en heimamönnum tókst að stöðva blæðinguna og byggja við forystu sína á ný. 

Svo fór að leiknum lauk með fimm marka sigri ÍR, 36-31. Algjörlega lífsnauðsynlegur sigur heimamanna sem eru þó enn í botnsæti deildarinnar en nú með sjö stig, tveimur stigum á eftir Þór Akureyri í ellefta sæti og þremur stigum á eftir HK í tíunda sætinu. 

Markahæsti leikmaður Olís deildarinnar til þessa, Baldur Fritz Bjarnason var markahæsti leikmaður vallarins í kvöld með tíu mörk. Andri Þór Helgason var markahæstur í liði HK með sjö mörk.