Á­hrifa­miklir norskir erind­rekar rann­sakaðir vegna Epsteins

Í frétt NRK segir að efnahagsbrotadeildin hafi meðal annars til rannsóknar hvort þau hafi grætt á stóðu Juul vegna samskipta þeirra við Epstein. Húsleit hefur verið framkvæmd á að minnsta kosti tveimur stöðum í dag vegna rannsóknarinnar.

Lýst var yfir á laugardaginn að Juul hefði sagt af sér sem sendiherra Noregs í Jórdaníu og Írak.

Það er eftir að fram kom í Epstein-skjölunum svokölluðu að barnaníðingurinn hafði þrýst á norskan mann til að selja hjónunum íbúð í Ósló undir markaðsvirði. Íbúðina keyptu þau árið 2018, á um helming þess sem hún var metin á.

Seljandinn var kaupsýslumaðurinn Morits Skaugen hann sagði nýverið, samkvæmt Aftenposten, að hann hefði ekki viljað selja íbúðina en hann hefði gert það vegna þrýstings frá Epstein. Fyrirtæki Skaugens var þá gjaldþrota og hann stóð í ýmsum málaferlum.

Börn þeirra hjóna áttu einnig, samkvæmt erfðaskrá Epsteins, að erfa tíu milljónir dala frá honum.

NRK segir Monu Juul lengi hafa verið áhrifamikla í Noregi. Á árum áður spilaði hún stóra rullu í gerð Óslóarsáttmálans milli Ísrael og Palestínu og hefur hún einnig verið sendiherra Noregs gagnvart Ísrael, Englandi og Sameinuðu þjóðunum.

Terje Rød-Larsen er einnig sagður vera einn af arkitektum Óslóarsáttmálans og hefur sinnt nokkrum stöðum innan Sameinuðu þjóðanna í gegnum árin.

Lögreglan í Noregi hefur einnig til rannsóknar samskipti Epsteins við Thorbjørn Jagland, fyrrverandi forsætisráðherra Noregs.