Segir Gumma Tóta á leið heim úr at­vinnu­mennsku

Þessu heldur Rikki G, íþróttalýsandi og umsjónarmaður Þungavigtarinnar, fram í færslu á samfélagsmiðlinum X í dag.

Segir hann að Guðmundur og félagslið hans Noah FC í Armeníu hafi komist að samkomulagi um að rifta samningi sín á milli að frumkvæði Guðmundar sem vilji flytja heim til Íslands með fjölskyldu sína. 

Guðmundur,  lék síðast hér á landi árið 2012 með liði ÍBV í efstu deild en fram að tíma sínum í Vestmannaeyjum hafði hann aðeins spilað með uppeldisfélagi sínu, Selfoss. 

Alls hefur Guðmundur leikið 59 leiki í efstu deild hér á landi en í atvinnumennskunni hefur hann spilað með liðum í Noregi, Danmörku, Svíþjóð, Bandaríkjunum, Grikklandi og nú síðast í Armeníu.

Guðmundur varð tvöfaldur meistari með Noah FC á síðasta tímabili í Armeníu en þar áður hafði hann unnið MLS bikarinn með New York City árið 2021 og árið 2016 varð hann tvöfaldur meistari með Rosenborg í Noregi.

Þá á hann að baki fimmtán A-landsleiki fyrir Íslands hönd.

„Guðmundur Þórarinsson (GT) myndi styrkja öll lið í Bestu deildinni,“ segir Rikki G í færslu sinni.