Fengið já­kvæð við­brögð frá Evrópu­sam­bandinu

„Þetta var góður fundur. Þetta er auðvitað mjög alvarlegt mál sem er til umræðu. Við fórum vel yfir þetta með tolla Evrópusambandsins á kísiljárn og stöðu og næstu skref. Við hrósuðum stjórnvöldum fyrir sína hagsmunagæslu í málinu en til viðbótar höfum við og fyrirtækin sjálf staðið vaktina núna í marga mánuði,“ sagði Sigurður Hannesson, framkvæmdastjóri Samtaka iðnaðarins, í kvöldfréttum Sýnar að loknum fundi með Þorgerði Katrínu Gunnarsdóttur utanríkisráðherra.

Mjög þungt andrúmsloft á fundum í Brussel

„Það var gott að sjá að þó að ákvörðunin væri vonbrigði þá að minnsta kosti hlutu okkar sjónarmið hljómgrunn í Evrópu. Í síðustu viku voru mjög mikilvægir fundir í Brussel þar sem okkar fólk var ásamt ráðherra og þingmönnum þar sem mótmælum var komið rækilega á framfæri á fundum þar sem andrúmsloftið var mjög þungt.

Við lögðum mikla áherslu á það að fá skýr skilaboð frá Evrópusambandinu, bæði embættismönnum og pólitíkusum, um það hvort þetta yrði fordæmi, hvort við gætum átt von á því að þetta gerðist aftur. Sem betur fer höfum við fengið skilaboð frá Evrópusambandinu um að svo sé ekki. Þau sjá ekki fyrir sér að þetta sé fyrirboði um það sem koma skal,“ bætti Sigurður við.

Vilja ekki að stjórnvöld svari fyrir sig

Sigurður segir að fyrstu viðbrögð frá fulltrúum Evrópusambandsins eftir ákvörðunina hafi verið góð.

„Á þeim grunni held ég að verkefnið hjá okkur sé það að styrkja EES-samninginn vegna þess að Evrópa er okkar stærsti markaður. EES-samningurinn er okkar mikilvægasti viðskiptasamningur og við eigum að byggja á honum áfram.“

Samtök iðnaðarins taki ekki undir með þeim sem hafi kallað eftir því að Ísland bregðist við með einhvers konar hefndaraðgerðum gagnvart Evrópusambandinu. Meðal annars hafa þingmenn stjórnarandstöðunnar lagt til að þingið geri hlé á innleiðingum nýrra EES-gerða í íslensk lög.

„Með hliðsjón af viðbrögðum Evrópusambandsins, sem greinilega átta sig á alvarleika málsins sem er gott að finna, þá teljum við ekki rétt að innleiðing til dæmis hökti. Þrátt fyrir að við séum mjög ánægð með hagsmunagæsluna þá teljum við að það þurfi að stórauka hagsmunagæslu gagnvart Evrópu. Það þarf að gerast á vettvangi stjórnmálanna, stjórnvalda en það þarf líka að gerast á vettvangi atvinnulífsins,“ sagði Sigurður að lokum.