„Við eigum enn­þá mögu­leika“

„Mér fannst þetta vera 50/50 leikur og hann réðist af augnablikum. Besti leikmaður þeirra steig upp þegar þess þurfti. Okkar leikmenn virtust ekki alveg vera með í dag af einhverjum ástæðum, kannski vegna þess að við höfum ekki spilað í einhvern tíma. Við fengum samt okkar tækifæri og spiluðum fínan fótbolta á köflum,“ sagði Nik Chamberlain, þjálfari Breiðabliks, eftir 0-1 tap liðsins í kvöld.

Gestirnir gerðu afskaplega vel varnarlega og sáu til þess að Breiðablik átti erfitt með að komast í góð færi.

„Við vorum svolítið að flýta okkur, en við náðum að laga það aðeins í seinni hálfleik. Liðið hefur ekki spilað í einhvern tíma og þá vantar aðeins upp á það. Við hefðum getað nýtt svæðin betur. Þær sátust neðar á völlinn eftir að þær skoruðu og vörðust, sem þær eru góðar í.“

Liðin mætast aftur eftir viku í Danmörku. Leikið verður á grasvelli sem er víst ekki upp á marga fiska.

„Ég held að völlurinn úti sé ekki góður, miðað við það sem ég hef heyrt. Ég held að þessi völlur verði þungur og við munum þurfa að aðlagast honum. Leikurinn úti verður líka 50/50 leikur og við verðum að passa okkur að halda haus og muna að við eigum ennþá möguleika. Þetta er bara eitt mark, við förum þangað og gefum allt í þetta.“