Segist engin deili kunna á raf­mynta­jöfri sem hann náðaði

Changpeng Zhao, stofnandi Binance, afplánaði fjóra mánuði og fangelsi og féllst á að stíga til hliðar sem forstjóri fyrirtækisins eftir að hann játaði sig sekan um aðhafast ekki gegn peningaþvætti sem fór fram í gegnum rafmyntakauphöllina.

Saksóknarar héldu því fram að Binance hefði sleppt því að tilkynna um færslur sem tengdust hryðjuverkasamtökum eins og Hamas, al-Qaeda og Ríki íslams og ýmis konar glæpastarfsemi, þar á meðal barnaníði og tölvuinnbrotum.

Trump forseti náðaði Zhao í síðustu viku og sagði þá að fjölmargir hefðu mælt með því við sig. Zhao hefði verið dæmdur fyrir engar sakir.

Náin tengsl eru á milli Binance og rafmyntaævintýri Trump-fjölskyldunnar sem hún hratt af stað aðeins örfáum dögum áður en Trump tók aftur við forsetaembættinu í janúar.

Þannig hefur bandaríski viðskiptamiðillinn Bloomberg sagt frá því að Binance hafi skrifað grunnkóðann fyrir svonefnda stöðugleikamynt World Liberty, rafmyntafyrirtæki Trump-fjölskyldunnar.

Trump-myntin fékk einnig byr undir báða vængi þegar þjóðarsjóður Sameinuðu arabísku furstadæmana féllst á að nota hana til að fjárfesta um tvo milljarða dollara í Binance.

„Ég vil frekar að þú spyrjir ekki þessarar spurningar“

Þegar Trump var spurður í fréttaskýringarþættinum Sextíu mínútum út í hvers vegna hann hefði náðað Zhao þrátt fyrir að saksókarar teldu hann hafa ógnað þjóðaröryggi Bandaríkjanna var annað hljóð komið í strokkinn.

„Allt í lagi, ertu tilbúin? Ég veit ekki hver hann er,“ sagði Trump við spyrilinn.

Hann myndi ekki eftir að hafa hitt Zhao, þótt að það kynni að vera að þeir hefðu hist. Hann hefði í raun „ekki hugmynd um hver hann er“. Honum hefði aðeins verið sagt að Zhao hefði verið fórnarlamb „nornaveiða“ fyrri ríkisstjórnar Joes Biden og demókrata.

Þegar tengsl Binance og World Liberty voru borin undir forsetann hélt Trump því fram að hann hefði ekkert vitað um það því hann hefði verið of önnum kafinn við annað. Synir hans sæju um rafmyntaviðskipti fjölskyldunnar.

Spurður að því hvort hann hefði áhyggjur af því að spillingarþefur væri af náðuninni í ljósi tengslanna sagðist Trump ekki getað svarað en að hann hefði ekki áhyggjur.

„Ég vil frekar að þú spyrjir ekki þessarar spurningar,“ sagði forsetinn í viðtali sem CBS-sjónvarpsstöðin birti aðeins hluta upp úr þrátt fyrir að hún hefði nýlega fallist á að greiða Trump fúlgur fjár fyrir að hafa birt klippt viðtal við Kamölu Harris, frambjóðanda demókrata, í aðdraganda kosninga í fyrra.

Forseti þingsins veit heldur ekker

Repúblikanar hafa að undanförnu haldið því fram að náðanir Biden á einstaklingum þegar hann var forseti séu ógildar vegna þess að hann notaði svokallaða undirskriftarvél til þess að staðfesta þær frekar en að skrifa undir þær persónulega.

Þegar Mike Johnson, forseti fulltrúadeildar Bandaríkjaþings og repúblikani, var spurður út í hvort hann hefði áhyggjur af því að Trump vissi ekki hver Zhao væri í ljósi gagnrýni repúblikana á Biden veik Johnson sér undan því að svara.

„Ég veit ekkert um það. Ég sá ekki viðtalið. Þú verður að spyrja forsetann um það. Ég er ekki viss,“ sagði Johnson sem hefur ítrekað sagst ekkert vita um gjörðir forsetans eða alríkisstjórnarinnar þegar fréttamenn hafa spurt hann um þær.