Bjarni Geir Al­freðs­son mat­reiðslu­maður látinn

Greint er frá andlátinu á heimasíðu Kokkalandsliðsins þar sem segir að Bjarni Geir hafi látist á dögunum.

Bjarni Geir fæddist í Reykjavík árið 1951 og helgaði líf sitt matargerð, var menntaður matreiðslumeistari og útskrifaður frá veitingastaðnum Óðali við Austurvöll. Hann var fyrsti neminn sem lauk þaðan námi árið 1972.

„Eftir útskrift hóf hann fjölbreyttan og litríkan starfsferil á mörgum kunnuglegum stöðum, meðal annars á Naustinu, á Skrínunni við Skólavörðustíg, á Ask við Laugaveg, og hann stofnaði sjálfur veitingastaðina Grillborg og Versali í Kópavogi, Stélið í Tryggvagötu, Rauða sófann á Hlemmi og Árnesti í Ármúla. Verk hans báru keim af eldmóði, hugviti og trú á íslenska matarmenningu.

Frá árinu 1996 rak hann veitingasöluna Fljótt og Gott á BSÍ, sem varð fljótt eitt kunnasta kennileiti ferðamanna og Íslendinga á ferðinni. Bjarni tók við rekstrinum á tíma þegar veitingasalan var að dragast saman, en með einurð, vinnusemi og ástríðu fyrir góðum mat tókst honum á innan við tveimur árum að snúa rekstrinum við og byggja upp blómlega starfsemi. Hann lagði áherslu á íslenskar hefðir í einföldu og hlýju umhverfi, og sagði oft með brosi að hann vildi bjóða fólki upp á „kjamma og kók" sem varð landsþekkt slagorð.

Bjarni var einnig lengi viðlóðinn kaffistofu Samhjálpar, þar sem hann lagði sig fram um að styðja þá sem áttu um sárt að binda. Þar nýtti hann bæði fagþekkingu sína og hlýtt hjarta til að skapa hlýlegt umhverfi og mannsæmandi máltíðir fyrir gestina. Starf hans þar var ekki aðeins þjónusta heldur köllun, og endurspeglaði trú hans á virðingu, umhyggju og reisn allra manna,“ segir á heimasíðu Kokkalandsliðsins.

Bjarni Geir var tvígiftur, Jennýju Árnadóttur og á með henni dótturina Katrínu og síðar Herdísi Björnsdóttur og á með henni dótturina Bjarneyju, en báðar störfuðu þær þær Jenný og Herdís með Bjarna í veitingarekstrinum á hverjum tíma. Börn Herdísar af fyrra hjónabandi eru Rakel og Björn.

Alltaf tilbúinn að rétta hjálparhönd

Um Bjarna segir ennfremur að áhugamál hans hafi verið fiskveiði, ferðalög innanlands og sund en hann var fastagestur í Sundlaug Seltjarnarness.

Félagar Bjarna Geirs í Klúbbi matreiðslumeistara segja hann hafa verið frumkvöðul á sviði íslenskrar matarmenningar og að hann hafi verið einn af þeim sem lögðu grunn að þeirri menningu sem klúbburinn stendur fyrir í dag — samvinnu, fagmennsku og virðingu fyrir hráefni og uppruna. Bjarni hafi alltaf tilbúinn að rétta hjálparhönd, miðla reynslu og hvetja ungt fólk í faginu.