Samstöðin tapaði fimm­tíu milljónum

Þetta kemur fram í ársreikningi Samstöðvarinnar fyrir árið 2024, annað heila rekstrarár félagsins.

Þar segir að tekjur félagsins hafi numið 14,2 milljónum króna í fyrra, samanborið við 11,2 milljóna króna tekjur árið áður. Aftur á móti námu rekstrargjöld 64,6 milljónum króna, samanborið við 35,3 milljóna króna kostnað árið áður.

Handbært fé minnkaði verulega

Þá segir að eignir félagsins í árslok í fyrra hafi numið 3,5 milljónum króna en skuldir 86,8 milljónum. Þannig var eigið fé félagsins neikvætt um 83,29 milljónir króna.

Þegar Vísir greindi í fyrra frá þungum róðri Samstöðvarinnar árið 2023 sagði Gunnar Smári Egilsson, ritstjóri Samstöðvarinnar, á Facebook að 24 milljóna króna tap gæfi skakka mynd af rekstri félagsins.

Nærtækara hefði verið að líta á sjóðstreymi félagsins, sem sýndi að handbært fé hefði aukist um 4,3 milljónir króna árið 2023. 

Í árslok árið 2023 nam það 5,5 milljónum króna en í árslok árið 2024 nam það 477 þúsund krónum.

Rúmar sex milljónir í styrk

Á vef Samstöðvarinnar segir að Samstöðin sé fréttamiðill og vettvangur fyrir róttæka samfélagsumræðu og raddir þeirra sem ekki fá rúm í umfjöllun meginstraumsmiðla. Þættir Samstöðvarinnar séu allt í senn fréttir, fundir, sjónvarps-, útvarps- og hlaðvarpsþættir og innlegg í gagnvirka umræðu á samfélagsmiðlum.

Þá segir að Alþýðufélagið sé eigandi Samstöðvarinnar. Félagið hafi það markmið að auðga og bæta umræðu í samfélaginu. Allir geti gengið í Alþýðufélagið með því að skrá sig fyrir áskrift að Samstöðinni.

Félagsgjöld í Alþýðufélagið séu 2.500 krónur á mánuði og renni óskipt til dagskrár og útsendinga Samstöðvarinnar. Þau sem vilji, geti borgað tvöfalda eða fjórfalda áskrift.

Alþýðufélagið var ekki ein þeirra 25 fjölmiðlaveitna sem hlutu rekstrarstuðning árið 2023 en árið 2024 hlaut félagið 6,4 milljónir króna í rekstrarstuðning.