„Mjög erfitt fyrir okkur ef við klárum þetta ekki í kvöld“

Ágúst Orri Arnarson skrifar 3. október 2025 12:31

Berglind Björg er markahæst í Bestu deildinni og stefnir á að vera Íslandsmeistari í kvöld. Vísir/Ívar

Breiðablik fær þriðja tækifærið til að vinna Íslandsmeistaratitilinn í kvöld þegar liðið mætir Víkingi. Mikilvægt er fyrir Blikana að klára verkefnið í kvöld því framundan er mikið leikjaálag, en Berglind Björg Þorvaldsdóttir hefur ekki trú á öðru en að sigur skili sér loksins.

Breiðablik þarf aðeins einn sigur til að verða Íslandsmeistari en það hefur mistekist í síðustu tveimur leikjum, fyrst í 2-1 tapi gegn Stjörnunni og svo í 3-2 tapi gegn Þrótti.

„Ég veit ekki alveg hvað gerðist í síðustu leikjum, við vorum að skora og mér fannst við gera fínt varnarlega. Ég vildi að ég hafði svarið við því, hvað fór úrskeiðis, en við erum allavega allar klárar í kvöld og staðráðnar í því að fagna titlinum á Kópavogsvelli“ sagði markahæsti leikmaður Bestu deildarinnar í samtali við Vísi.

Þetta er óvenjuleg staða fyrir Breiðablik, sem hafði aðeins tapað einum leik í allt sumar.

„Klárlega, ég man ekki hvenær maður tapaði síðast tveimur leikjum í röð með Breiðablik. En það segir manni bara að deildin er gríðarlega sterk, maður þarf að mæta í alla leiki og gera sitt besta.“

Þétt prógramm

Næstu tvo miðvikudaga mun Breiðablik spila umspilseinvígi gegn Spartak frá Serbíu upp á sæti í Evrópubikarnum. Þess á milli mætir liðið Val og spilar svo lokaleik tímabilsins við FH laugardaginn 18. október.

„Við höfum í rauninni mjög lítið talað um Evrópukeppnina en það væri mjög gott að klára titilinn og fara svo í Evrópukeppnina því það er þétt prógramm framundan. Við mætum Val, förum út og eigum svo leik á móti FH einum og hálfum sólarhring síðar.

Þannig að það væri mjög erfitt fyrir okkur ef við klárum þetta ekki í kvöld, en ég trúi ekki öðru en að við gerum það… Það eru allir mjög pirraðir eftir síðustu tvo leiki þannig að já, ég trúi ekki öðru en að við mætum stemmdar.“