Múla­kaffi nýtir farþegamiðstöðina yfir veturinn

Byggingin er 5.500 fermetrar og á tveimur hæðum og stendur hún við Viðeyjarsund.

Farþegamiðstöðin mun samkvæmt samningnum fá nýtt hlutverk sem vettvangur fyrir samkomur og veislur frá október og út mars á ári hverju. Samningurinn gildir til fimm ára.

„Við sjáum gríðarleg tækifæri í nýrri farþegamiðstöð í Sundahöfn. Veisluþjónusta í sinni breiðustu mynd er kjarnastarfsemi okkar í Múlakaffi og á þeim markaði er mikil umfram eftirspurn eftir aðstöðu, sem ný farþegamiðstöð mun mæta. Um er að ræða stórglæsilega veislusali með óviðjafnanlegu útsýni á magnaðri staðsetningu við sjávarsíðuna og hlökkum við til þess að bjóða okkar stóra hópi viðskiptavina upp á nýjan áfangastað fyrir veislur og viðburði af öllum stærðum og gerðum,“ segir Guðríður María Jóhannesdóttir, framkvæmdastjóri Múlakaffis, í tilkynningu.

Hún segir að þegar hafi borist fyrirspurnir varðandi haustið 2026 og hafi nokkrar stórar árshátíðar hjá íslenskum fyrirtækjum og ráðstefnur verið bókaðar.

Í tilkynningunni segir að um þrjú hundruð þúsund ferðamenn hafi farið um Faxaflóahafnir á ári, undanfarin ár, með 260 skipum. Sérstök áhersla hafi verið lögð á að fjölga skiptafarþegum sem ferðast um Keflavíkurflugvöll á leið sinni í ferðalög með skemmtiferðaskipum, en þeir dvelja lengur á landinu og skapa þar með aukin verðmæti fyrir samfélagið. Hlutfall skiptifarþega af heildarfjölda gesta í ár er áætlað 52,4% og hefur aldrei verið hærra.

„Ný farþegamiðstöð mun gerbylta allri aðstöðu og þjónustu við farþega skemmtiferðaskipa sem koma til Reykjavíkur. Miðstöðin mun styrkja starfsemi okkar sem leiðandi höfn í Norður-Atlantshafi og er liður í áframhaldandi sókn okkar við að auka hlut skiptifarþega skemmtiferðaskipa sem hefja eða ljúka ferð sinni á Íslandi. Við hönnun hússins höfum við gert ráð fyrir að það nýtist allan ársins hring, líka á þeim tímum þegar skemmtiferðaskip eru ekki á ferðinni við Ísland. Við viljum halda líflegri starfsemi í húsinu yfir vetrarmánuðina og þar kemur Múlakaffi til sögunnar með sína sérþekkingu og áratuga reynslu. Framkvæmdum við húsið miðar vel og við hlökkum til að bjóða fyrstu farþegana velkomna þar næsta vor,“ segir Inga Rut Hjaltadóttir, sviðsstjóri framkvæmdasviðs hjá Faxaflóahöfnum í tilkynningunni.

Fyrsta skóflustungan að farþegamiðstöðinni var tekin í mars í fyrra, eins og sjá má í spilaranum hér að neðan.