Hrun í makríl og kol­munna

Farið er yfir helstu niðurstöður veiðiráðgjöfar Alþjóðahafrannsóknaráðsins, ICES, fyrir uppsjávarfiskistofna í NA-Atlantshafi árið 2026 á vef Hafrannsóknarstofnunar.

Þar er tekið fram að ekki sé í gildi samkomulag milli þeirra þjóða sem stunda veiðar úr þessum þremur deilistofnum um skiptingu aflahlutdeildar. Hver þjóð hafi því sett sér aflamark einhliða undanfarin ár með þeim afleiðingum að veiðar hafi verið umfram ráðgjöf ICES um árabil.

Þriðjungi meiri síld

Á vef Hafró segir að ICES leggi til, í samræmi við langtímanýtingastefnu, að afli norsk-íslenskrar vorgotssíldar ársins 2025 verði ekki meiri en tæp 534 þúsund tonn. Ráðgjöf yfirstandandi árs hafi verið 402 þúsund tonn og því sé um 33 prósenta hækkun á tillögum ráðsins milli ára.

Árgangar síðustu ára hafi verið litlir og árgangurinn frá 2016 verið uppistaðan í veiðinni síðustu ár. Árgangarnir frá 2021 og 2022, sem séu að koma inn í veiðistofninn, séu hins vegar metnir yfir meðalstærð, sem leiði til hækkunar á ráðgjöfinni milli ára.

Áætlað sé að heildarafli ársins 2025 verði um 435 þúsund tonn, sem sé 8 prósent umfram ráðgjöf ársins.

Makríllinn þurrkast nánast út

Þá segir að ICES leggi til, í samræmi við nýtingarstefnu sem muni leiða til hámarksafraksturs til lengri tíma litið, að makrílafli ársins 2026 verði ekki meiri en 174 þúsund tonn. Ráðgjöf yfirstandandi árs hafi verið 577 þúsund tonn og því sé um að ræða 70 prósenta lægri ráðgjöf nú. Ástæða þess sé minnkandi hrygningarstofn og lækkun á veiðihlutfalli þar sem hrygningarstofnstærð sé undir varúðarmörkum árið 2025.

Áætlað sé að heildarafli ársins 2025 verði ríflega 755 þúsund tonn, sem sé 31 prósent umfram ráðgjöf.

Stofninn minni vegna fiskveiðidauða

Loks segir að ICES leggi til, í samræmi við langtímanýtingarstefnu, að kolmunnaafli ársins 2026 verði ekki meiri en 851 þúsund tonn. Ráðgjöf yfirstandandi árs hafi verið 1,45 milljón tonn og því sé um að ræða rúmlega 41 prósent lækkun á ráðgjöf frá í fyrra.

Ástæðan fyrir lækkun á ráðgjöf sé minnkandi veiðistofn, sem helgist af miklum fiskveiðidauða og litlum árgöngum, sem séu að ganga inn í stofninn frá 2022 til 2024 og stærð hrygningarstofns síðustu ár sé nú metinn minni en mat þeirra tíma. Lægra mat nú skýrist af því að vísitala kolmunna í stofnmælingu á hrygningarslóð árið 2025 hafi lækkað um 34 prósent samanborið við árið 2024.

Áætlað sé að heildarafli ársins 2025 verði ríflega 1,75 milljón tonn, sem sé 21 prósent umfram ráðgjöf.