Trump segist nokkuð viss um að grunaður morðingi hafi verið hand­samaður

Þetta kom fram í máli Trump í viðtali við Fox News í dag. 

„Ég held við séum með hann,“ sagði Trump meðal annars og bætti við að einhver nákominn manninum hafi gefið upplýsingar sem komið hafi honum í hendur yfirvalda, að því er fram kemur í umfjöllun Sky News þar sem vitnað er í viðtalið á Fox. Það hafi verið faðir byssumannsins sem hafi sannfært hann um að gefa sig fram við lögreglu.

„Ég held með nokkuð mikilli vissu að við séum með hann í haldi. Hann er í haldi. Allir stóðu sig frábærlega í starfi, svæðislögregla og ríkisstjórinn,“ er haft eftir Trump. Viðkomandi sé nú í haldi í höfuðstöðvum lögreglu. 

Molar úr viðtalinu við Trump hafa verið að birtast jafnt og þétt í erlendum miðlum, en Trump hefur síðan sett fyrirvara við upplýsingarnar um hinn grunaða. Þær þurfi að staðfesta og gæti verið að verði leiðréttar. Áður hafði Kash Patel, yfirmaður bandarísku Alríkislögreglunnar sjálfur farið út með upplýsingar um að hinn grunaði væri í haldi sem síðan reyndust ekki réttar.

Fréttastofa NBC hefur eftir heimildarmönnum innan lögreglunnar að hinn grunaði sé hinn 22 ára gamli Tyler Robinson, íbúi í Utah. Trump hafði áður sagst telja að maðurinn væri 28 eða 29 ára gamall, þó með fyrirvara.

Blaðamannafundur að hefjast

New York Times segir í sinni umfjöllun að ónefndur embættismaður innan lögreglunnar hafi staðfest að það sé rétt sem fram kom í máli Trump í viðtalinu að búið sé að handsama hinn grunaða. Ekki verði þó greint frá nafni hins grunaða að svo stöddu. Boðað hefur verið til blaðamannafundar þar sem þess má vænta að frekari upplýsingar komi fram. Fundurinn er sagður eiga að hefjast klukkan 13 að íslenskum tíma. 

Útsendingu AP frá fundinum má sjá hér þegar fundur hefst:

Alríkislögreglan hefur birt myndskeið sem sýnir einstakling sem grunaður er um að hafa banað Charlie Kirk hlaupa eftir þaki byggingar, stökkva niður, og ganga í burtu. Samkvæmt texta sem fylgdi myndskeiðinu segir að grunaði hafi klifrað upp á þakið um klukkan tólf á hádegi en myndskeiðið sýni hann stökkva af þakinu og ganga á brott eftir að „hann skaut og myrti Charlie Kirk“ um tuttugu mínútum síðar.

Sjá einnig: Al­ríkis­lög­reglan birtir mynd­skeið af morðingjanum

Trump hrósaði í hástert öllum þeim laganna vörðum sem tekið hafi þátt í þeirri miklu vinnu sem hafi farið fram við að reyna að hafa hendur í hári hins grunaða. 

„Veistu, að ná einhverjum þar sem þú byrjar með ekkert í höndunum, og við byrjuðum með eina klippu sem lét hann líta út eins og maur, sem var nánast ónothæft,“ sagði Trump.

„Það er mjög magnað, þegar þú byrjar bara með það en svo allt í einu verðuru heppinn, eða hæfileikaríkur, eða hvað sem það er.“

Fréttin hefur verið uppfærð.