Á bát í Kyrra­hafi þegar skjálftaflóðbylgjur skullu á

Jarðskjálftinn reið yfir rétt fyrir miðnætti að íslenskum tíma og voru upptök hans austur af Kamtsjatka-skaga á 47 kílómetra dýpi. Skjálftaflóðbylgjuviðvaranir voru gefnar út um allt Kyrrahafið og var sérstaklega óttast um flóðbylgjur á Havaí og í Japan.

Undanfari eldgoss

Hæstu flóðbylgjurnar lentu á hafnarborgum á Kamtsjatkaskaga, þar sem öldur náðu fjögurra metra hæð í borginni Severo-Kurilsk, þar sem sjórinn sópaði með sér öllu steini léttara. Grjót hrundi úr hlíðum skagans og sjómenn náðu myndum af sæljónum flýja í hafið á meðan skjálftinn reið yfir.

Eldgos hófst svo í Kljútsjevskoj-fjalli eftir hádegi að íslenskum tíma en en reglulega hefur gosið í fjallinu á síðustu árum.

Við strendur Kyrrahafsins flúðu margir á hærra land og mynduðust umferðarteppur víða. Áhrifin voru þó minni en talið var að yrði í fyrstu

Hræðileg upplifun

Óttar Ómarsson er staddur í Frönsku Pólýnesíu, þar sem hann er á mánaðarlangri siglingu ásamt níu manna danskri áhöfn. Þegar fréttastofa náði tali af Óttari var hann einn áhafnarmeðlima sem var vakandi - hann stóð flóðbylgjuvaktina á meðan aðrir sváfu. Klukkan var þá hálf tvö um nótt.

„Að upplifa þetta er hræðilegt því við fréttum af þessu á meðan við erum að borða hrísgrjónagrautinn okkar í kvöldmat,“ segir Óttar. 

Fregnir bárust þá af jarðskjálfta við Rússlandsstrendur, um 9.000 kílómetra í burtu. Hópurinn fylgdist grannt með fréttum frá Havaí, þar sem bylgjurnar skullu fyrst á.

„Eins og við vitum núna þá fór ekkert úrskeiðis, ekkert það slæmt. Nú er komið að okkur að fá sömu bylgjur, eða öldur.“

Óttaðist endurtekningu frá 2004

Bátur Óttars er undan ströndum Tahítí en fyrir innan rifið, sem veitir eyjunum nokkuð skjól. Hefði allt farið á versta veg var áhöfnin með neyðarplan tilbúið.

„Þannig að við vorum búin að safna vegabréfunum frá öllum í einn poka og tilbúin með bátinn og svo voru allir með töskurnar sínar og dótið sitt tilbúið til að fara af bátnum bara með nauðsynjavörur og mat. Þá hefðum við klifrað upp á fjallið og það var planið að klifra upp á hálendið,“ segir Óttar. 

Hann hafi séð myndefni af flóðbylgjunni sem skall á í Indlandshafi árið 2004, í kjölfar jarðskjálfta sem var 9,1 til 9,3 að stærð, en þá létust á þriðja hundrað þúsund. Tilhugsunin um að vera í sömu aðstæðum hafi vakið ótta.

„Núna líður mér vel en ég var rosalega hræddur áðan því það var rosalega mikil óvissa. Maður hefur séð vídeó af því sem hefur gerst í Taílandi, Indónesíu og maður var hræddur um að nú væri komið að okkur.“