Fær­eyingar unnu bronsið á HM U21 í hand­bolta

Færeyska liðið vann eins marks sigur á Svíþjóð, 27-26, í leiknum um þriðja sætið eftir að staðan var jöfn í hálfleik, 12-12.

Leikurinn var jafn þar til um miðjan seinni hálfleik þegar færeyska liðið náði frábærum kafla og breytti stöðunni úr 18-18 í 23-19. Færeyingarnir lögðu þar grunninn að frábærum sigri sínum gegn einu af stórveldum handboltans.

Færeyska liðið náði mest fimm marka forskoti en Svíarnir gáfust ekki upp og komu muninum aftur niður í eitt mark. Dauðþreytt færeyska lið náði samt að halda út og fagnaði sigrinum gríðarlega.

Óli Mittún var með níu mörk í þessum leik en hann varð langmarkahæsti leikmaður mótsins. Ísak Vedelsbøl bætti við sex mörkum. Þeir spila báðir með Sävehof og sigurinn á Svíum var því örugglega enn sætari fyrir vikið. Aleksandar Lacok, markvörður liðsins, stóð sig mjög vel og var valinn maður leiksins.

Þetta eru söguleg verðlaun hjá Færeyingum á stórmóti og örugglega eitt mesta íþróttaafrekið í sögu þessar fámennu þjóðar.

Færeysku strákarnir skildu íslenska liðið eftir í riðlinum (jöfnuðu í blálokin) og fóru síðan alla leið í átta liða úrslitin þar sem þeir slógu út Slóvena

Þýskaland varð í fimmta sætinu eftir 27-26 sigur á Egyptalandi en Slóvenía tók sjöunda sætið eftir 24-23 sigur á Noregi. Danmörk og Portúgal spila um heimsmeistaratitilinn seinna í kvöld.