Aldrei séð föður sinn jafn glaðan og sáttan í einu og sama verk­efninu

Orri Steinn hefur fylgst náið með gengi KR það sem af er tíma­bili og af þeim tíma sem hann hefur varið hér heima milli tíma­bila á Spáni hefur hann verið í kringum KR-liðið og segir frábæra stemningu ríkja í her­búðum liðsins.

„Það hefur verið geggjað að fylgjast með og sjá pabba blómstra sem þjálfari. Ég held ég hafi aldrei séð hann eins glaðan og sáttan í einu verk­efni,“ segir Orri um föður sinn Óskar Hrafn, þjálfara KR, sem er á sínu fyrsta heila tíma­bili sem þjálfari liðsins eftir að hafa tekið við stjórnar­taumunum í Vestur­bænum um mitt síðasta tíma­bil.

„Mjög neðarlega á listanum mínum“

KR, líkt og svo oft áður, hefur verið mikið á milli tannanna á fólki það sem af er tíma­bili í Bestu deildinni. Þrátt fyrir að liðið sé aðeins einu stigi frá fallsæti, en með leik til góða á liðin fyrir neðan sig, þá þykir liðið hafa spilað einn skemmti­legasta fót­boltann í Bestu deildinni hingað til.

KR hefur skorað flest mörk í deildinni en einnig fengið á sig tölu­vert mikið af mörkum. Áherslan hjá Óskari Hrafni hefur verið á sóknarþunganum og frá því verður ekki vikið eins og hann sjálfur hefur oft komið inn á.

„Ég myndi ekki giska á að Óskar Hrafn fari að efast um sjálfan sig,“ segir Orri Steinn. „Það er mjög neðar­lega á listanum mínum. Það er enn nóg eftir af þessu móti, þeir eru enn með nokkra menn í meiðslum og það vantar smá upp á. Ég tel það bara tíma­spursmál hvenær allt fer að smella saman, bæði sóknar- og varnar­lega. Auðvitað búið að vera betra sóknar­lega en ég held þetta komi allt því lengra sem líður á tíma­bilið.“

Hefur alltaf verið svona

KR heimsækir Val í Bestu deildinni í kvöld í Reykja­víkurs­lag en á tíma­bilinu hefur Óskar Hrafn vakið at­hygli fyrir líkingar sínar í viðtölum og vísanir í sögur fyrri tíðar. Eftir jafn­tefli gegn Val fyrr á tíma­bilinu sagði hann KR liðið ekki ætla fara spila með belti, axla­bönd og „áhættu­tryggingu frá Lloyd's í Bret­landi“ og þá vísaði hann einnig í spænska land­vinninga­manninn Hernán Cortés sem brenndi öll sín skip eftir að hafa siglt þeim til Mexíkó árið 1519: „Við erum búnir að brenna skipin. Það verður ekki aftur snúið.“

Þessar líkingar eru ekki nýjar af nálinni hjá Óskari, Orri sem spilaði undir stjórn föður síns fyrr á ferlinum, varð snemma var við þær.

„Já hann hefur oft komið með góðar líkingar, alveg frá því við vorum í þriðja flokki að spila á Gróttu­vellinum. Þar var hann í stuttu líkingunum sem voru ekki alveg jafn flóknar og þessar sem hann kemur með í dag. Hann er aðeins búinn að stíga upp í flókindunum. En hann hefur alltaf verið svona, eitt­hvað sem ég hef séð mjög oft hjá honum. Núna hefur þetta slegið í gegn, menn eru búnir að brenna skipin.“

Viðtalið við Orra Stein, sem tekið var í síðasta landsleikjaglugga, má sjá í heild sinni hér fyrir neðan:  

„Stór hluti af lífi okkar“

Feðgarnir eru dug­legir við að heyra hvor í öðrum og ræða lífið í boltanum.

„Það er auðvitað búinn að vera stór hluti af lífi okkar beggja að hjálpa hvor öðrum í öllu. Hann sem þjálfari og ég sem leik­maður, við getum horft á hlutina öðru­vísi frá hjá hvor öðrum. Við ræðum mikið um taktík, stöðu, hvernig ég get spilað betur og hvað hann getur lag­fært. Þetta hefur verið stór hluti af lífi okkar að geta alltaf hringt í hvorn annan, ein­hvern innan fjöl­skyldunnar sem er alveg klikkaður í fót­bolta. Það er eitt­hvað sem ég er mjög glaður að eiga, það hjálpaði mér sem ungum leik­manni og var að koma upp. Þurfti að vera dug­legur að æfa og bæta mig sem leik­maður.“

Valur og KR mætast í Reykja­víkurs­lag í Bestu deildinni í fót­bolta í beinni út­sendingu á Sýn Sport klukkan korter yfir sjö í kvöld.