Vestramenn á­fram í undan­úr­slit Mjólkurbikarsins

Vestra menn skoruðu fyrsta markið á 30. mínútu þar sem Guðmundur Arnar tók hornspyrnu sem hitti á Eið Aron inn í teig. Hann skallaði fyrir markið, og Gustav Kjeldsen tók gott skot af stuttu færi sem fór framhjá Aron Birki í marki Þórs.

Það leið ekki langur tími þangað til að Vestri tvöfaldaði forystuna, því á 36. mínútu skoraði Vladimir Tufegdzic. Þar átti Eiður Aron langan bolta fram á Gunnar Jónas. Gunnar þá kominn í góða stöðu en rennir boltanum á Tufegdzic sem skoraði í autt markið.

Þórsarar áttu nokkrar álitlegar sóknir í seinni hálfleik og gerðu atlögu að því að komast aftur inn í leikinn. Boltinn fór hins vegar ekki í netið, Vestri varðist vel og tryggði sigurinn þannig. Vestri er eitt besta varnarlið landsins, en þeir hafa aðeins fengið á sig sjö mörk í ellefu leikjum í deildinni.