Cave vildi ekki taka þátt í „kjána­legri lang­loku“ Morriss­ey gegn „vók“

Morrissey, sem var þekktastur sem annar forsprakka hljómsveitarinnar The Smiths á 9. áratug síðustu aldar, nálgaðist Cave um að hann syngi með honum lag í fyrra. Í svari við spurningu aðdáanda á vefsíðu sinni segist Cave hafa hafnað því þar sem lagið hafi verið „óþarflega ögrandi og svolítið kjánaleg andvók (e. anti-woke) langloka“.

Ekki er þó svo að skilja að Cave skilgreini sjálfan sig sem vók. Þvert á móti segist hann hafa að einhverju leyti verið sammála því sem Morrissey reyndi að koma á framfæri í laginu. Það hafi bara ekki verið fyrir hann.

„Ég reyni að halda pólitík, hvort sem hún er af menningarlegum toga eða öðrum, út úr tónlistinni sem ég tek þátt í. Mér finnst að hún dragi úr vægi hennar og vinni gegn því sem ég er að reyna að ná fram,“ skrifaði Cave.

Fór Cave ennfremur lofsorðum um Morrissey og lýsti honum sem líklega besta textahöfundi sinnar kynslóðar.

Þykir gott að reita fólk til reiði

Margir aðdáendur The Smiths og Morrissey hafa orðið fráhverfir honum á síðustu árum en söngvarinn hefur tekið sér stöðu á hægri jaðri breskra stjórnmála og daðrað við hvíta þjóðernishyggju.

Cave sagði í svari sínu að Morrissey væri óneitanlega flókinn maður sem skiptar skoðanir væru um. Hann virtist njóta þess að reita fólk til reiði. Sjálfum fyndist Cave það ekki spennandi.

Ástralinn hefur sjálfur gagnrýnt það sem hefur verið nefnt vók hugmyndafræði á undanförnum árum. Árið 2019 sagði hann að þrátt fyrir góðan ásetning skorti hana auðmýkt og að hún væri of kreddukennd. Í fyrra bætti hann við að þótt hann aðhylltist sjálfur félagslegt réttlæti væri hann ekki sáttur við þær aðferðir sem beitt hefði verið til þess að ná því fram, að útiloka fólk og þagga niður í því, að því er kemur fram í frétt The Guardian.

Vók heitt umræðuefni öldunga eins og Cave og Morrissey

Hugtakið vók (e. woke) hefur verið fyrirferðarmikið í umræðunni að undanförnu, ekki síst í aldurhópum tónlistarmannanna tveggja sem eru á sjötugs- og áttræðisaldri.

Það á uppruna sinn að rekja til blökkumanna í Bandaríkjunum og þýðir meðvitund eða árvekni um kerfisbundna mismunun sem þeir hafa sætt þar frá upphafi vega. Í seinni tíð hefur það einnig verið notað um meðvitund um ýmis konar annað félagslegt óréttlæti.

Eftir að hugtakið fékk meiri útbreiðslu í tengslum við mikil mótmæli og kynþáttaóeirðir í borginni Ferguson í Bandaríkjunum þar sem hvítur lögreglumaður skaut óvopnaðan blökkumann til bana varð það að skammaryrði í augum marga hægrimanna vestanhafs. 

Alþjóðleg útbreiðsla þess hófst svo af alvöru eftir MeToo-byltinguna svonefndu og dráp bandarískra lögreglumanna á George Floyd árið 2020. Morrissey tók meðal annars upp hanskann fyrir bæði Harvey Weinstein og Kevin Spacey eftir að þeir voru sakaðir um kynferðisbrot í MeToo-bylgjunni.

Deilurnar um ágæti árverkni um félagslegt óréttlæti má að miklu leyti rekja til þess að andstæðar fylkingar leggja ólíkan skilning í hugtakið. Í hugum fylgjenda þess merkir það umburðarlyndi og meðvitund um sögulegt óréttlæti sem minnihlutahópar hafa orðið fyrir. Andstæðingar þess telja því aftur á móti ætlað að þagga niður í ákveðnum röddum, ekki síst þeim sem eru gagnrýnar á útlendinga og trans fólk.