Leita að ein­hverjum til að reka Kola­portið á­fram á sama stað

Áfram á að reka svonefndan almenningsmarkað í Kolaportinu við Tryggvagötu 19 þar sem hann hefur verið síðustu tuttugu árin. Auglýst var eftir nýju húsnæði fyrir markaðinn í fyrra þegar ríkið ætlaði að hýsa Listaháskóla Íslands í húsinu. Hætt var við þau áform og heldur borgin áfram að leigja húsið af framkvæmdasýslunni-ríkiseignum.

Auk þess að velja þá sem fá að stunda starfsemi í Kolaportinu og reka húsið á rekstraraðilinn að afla tilskilinna leyfa og sjá um kynningar- og markaðsmál fyrir markaðinn. Lágmarksleigufjárhæð á mánuði í útboðinu eru tæpar 3,8 milljónir króna.

Kolaportinu er lýst sem „einstökum samkomustað í miðborginni þar sem mannlíf, menning og frumkvöðlastarf dafna“ í tilkynningu um útboðið á vef Reykjavíkurborgar.

„Sýn borgarinnar er að Kolaportið þróist áfram sem kraftmikill almenningsmarkaður, staður þar sem frumkvöðlar geta prófað nýjar hugmyndir, vörur og þjónustu, og þar sem nýsköpun, handverk, matarmenning og fjölbreytt verslun mynda einstakan samruna. Markaðurinn á að vera aðgengilegur öllum og stuðla að þátttöku fólks úr öllum áttum samfélagsins með blómlegu viðburðarhaldi,“ segir ennfremur í hástemmdum lýsingum borgarinnar á Kolaportinu.

Kolaportið fékk töluverða andlitslyftingu árið 2021. Þá var komið upp nútímalegum bar og götumatsölustöðum. Húsnæðið hefur einnig verið notað sem veislusalur síðan þá.