Efast um að veitinga­menn óttist að styggja em­bættis­menn

Vísir hefur undanfarna daga fjallað um erfiði veitingamanna í Reykjavík við að fá umsóknir samþykktar. Eigandi bakarísins Hygge segist til dæmis hafa beðið mánuðum saman eftir leyfi sem liggi í augum uppi að hann ætti að fá. 

Þá stóðu dyr veitingastaðarins Kastrup lokaðar í um sex vikur eftir að heilbrigðiseftirlitið innsiglaði staðinn vegna vöntunar á tilskildu starfsleyfi. Langborðinu á Laugavegi hefur sömuleiðis verið frestað vegna regluverks heilbrigðiseftirlitsins.

Fólk fljótt í samsæriskenningar

Einar Bárðarson, framkvæmdastjóri SVEIT, sagði í samtali við fréttastofu í gær að margir veitingamenn óttist að styggja stjórnsýsluna en veitingamenn lýsa erfiðum samskiptum við heilbrigðiseftirlitið. Veitingamenn sem fréttastofa hefur rætt við hafa einnig lýst erfiðum í samskiptum við heilbrigðiseftirlitið, og jafnvel dónaskap.

Hjálmar Sveinsson, formaður heilbrigðisnefndar Reykjavíkur, sat fyrir svörum í Bítinu í dag. Hann segir frásagnir Einars koma sér á óvart. 

„Ég leyfi mér að efast um að það sé mikið um þetta. Ég er alveg viss um að svo sé. En ég þekki þetta líka úr skipulagsráði þegar menn og konur sækja um að byggja við húsin sín og fá neitun. Þá gerist það fljótt að fólk fari í ákveðna samsæriskenningu: Þessum skipulagsfulltrúa er bara illa við mig. Og þá gleymist það stundum að viðkomandi hafði aldrei neinar heimildir til að gera það sem hann sótti um.“

Hjálmar segir nýja veitingastaði og kaffihús opna hér um bil í hverri viku.

„Þegar það verða svona árekstrar kemur í ljós að þeir sem eru að sækja um tiltekin leyfi hafa ekki farið nákvæmlega í hvað þeim ber að gera og leggja fram.“

Hann segist ekki vilja nefna einstök mál sem hafa komið upp hjá eftirlitinu en tekur dæmi sem felur í sér starfsleyfisumsókn um bakarí í fjölbýlishúsi. 

„Þú getur ekki verið með mjög stórt framleiðslubakarí þar sem bílar koma kannski klukkan sex á morgnana að ná í splunkunýjar [veitingar]. Þá er öruggt að íbúar sem búa fyrir ofan verða mjög óánægðir, fá sér lögfræðing og kæra þetta fyrirkomulag.“

Þáttastjórnandi nefnir þá að veitingamenn kvarti undan því að heilbrigðisfulltrúar leiðbeini þeim ekki nægilega vel í umsóknarferlinu.

„Það kemur mér á óvart,“ segir Hjálmar og nefnir leiðbeiningaskyldu heilbrigðisfulltrúa, þeim beri að veita umsækjendum upplýsingar um þeirra rétt og hvar sé hægt að nálgast nauðsynleg gögn.

„Hins vegar segi ég líka að heilbrigðisfulltrúi getur ekki orðið ráðgjafi. Hann getur ekki verið þátttakandi í umsókninni af því að hann þarf síðan að hafa eftirlit.“

Mótmæltu reglugerðinni

Regluverkið sem hefur reynst veitingamönnum hvað mest íþyngjandi snýr að því að auglýsa þarf drög að starfsleyfi þegar nýr starfsleyfishafi tekur við starfsleyfisskyldum rekstri, jafnvel þó engar breytingar verði á starfseminni. 

Jóhann Páll Jóhannsson, umhverfis orku- og loftslagsráðherra, hefur nú afnumið þann hluta reglugerðar um hollustuhætti, sem var settur á síðasta kjörtímabili þegar Guðlaugur Þór Þórðarson sat í embættinu.

Hjálmar segir heilbrigðiseftirlit Reykjavíkur hafa harðlega mótmælt umræddri reglugerð á sínum tíma. 

„Og sagði að hún væri mjög íþyngjandi, myndi tefja allt, og að hún væri óþarfi. Það var ekki hlustað á okkur. Þetta fór í gegn.“