Handbolti

Stór­leikur Janusar og fimm marka for­skot ekki nóg í Ís­lendinga­slag um titilinn

Óskar Ófeigur Jónsson skrifar
Janus Daði Smárason lék vel í kvöld en það dugði ekki til.
Janus Daði Smárason lék vel í kvöld en það dugði ekki til. VÍSIR/VILHELM

Aron Pálmarsson er einu skrefi nær enn einum meistaratitlinum á ferlinum eftir sigur Veszprém í fyrsta leiknum í úrslitaeinvíginu um ungverska meistaratitilinn í handbolta.

Veszprém vann leikinn með tveggja marka mun, 34-32, en gestirnir i Szeged voru tveimur mörkum yfir í hálfleik, 16-14.

Veszprém er deildarmeistari og á heimavelli í þessum leik. Liðið var í vandræðum framan af leik en sýndi styrk sinn þegar á leið leikinn.

Janus Daði Smárason átti góðan leik fyrir Szeged og var með sjö mörk úr átta skotum. Það er svekkjandi fyrir hann að stórleikur hans og gott forskot í fyrri hálfleik hafi ekki dugað.

Janus nýtti fyrstu þrjú skotin sín í fyrri hálfleik en Szeged var mest fimm mörkum yfir í hálfleik (12-7, 13-8, 14-9 og 15-10), en leiddi 16-14 í leikhléi eftir 4-1 endasprett Veszprém í hálfleiknum.

Veszprém hélt áfram í seinni hálfleik og náði frumkvæðinu í leiknum. Jafnaði fyrst í 20-20 og komst síðan yfir í 21-20. Szeged náði aftur forystu en í stöðunni 27-26 fyrir gestina náði Veszprém öðrum frábærum kafla sem skilaði liðinu þriggja marka forystu.

Það lið verður ungverskur meistari sem fyrr vinnur tvo leiki. Næsti leikur er á heimavelli Szeged.

Aron Pálmarsson klikkaði á báðum skotum sínum í fyrri hálfleiknum og náði heldur ekki að nýta skot sitt í seinni hálfleik.

Bjarki Elíasson var ekki með Veszprém í kvöld. Frakkinn Hugo Descat var frábær hjá Veszprém en hann skoraði tólf mörk í leiknum.




Fleiri fréttir

Sjá meira


×