„Ég set spurningar­merki við þennan tíma­punkt“

Helena Ólafsdóttir, þáttastjórnandi Bestu markanna, velti þessari spurningu upp í síðasta þætti en Íslandsmeistarar Breiðabliks máttu þola sitt fyrsta tap þegar þær sóttu FH heim í síðustu umferð Bestu deildar kvenna í fótbolta.

„Ég held ekkert að það sé málið en Nik (Chamberlain, þjálfari Breiðabliks) gerir breytingar fyrir þennan leik. Hann breytir úr sínu tígul-kerfi og fer í 4-3-3 eða 4-2-3-1 eða hvernig sem þú vilt gera það. Finnst líklegt að hann hafi ætlað að herja á svæðin á bak við bakverðina í þriggja manna línunni hjá FH,“ sagði Bára Kristbjörg Rúnarsdóttir, sérfræðingur, og hélt svo áfram.

Hann breytir, tekur Birtu (Georgsdóttur) og Andreu (Rut Bjarnadóttur) út en þær hafa verið að spila mjög vel sóknarlega. Hann gerir áherslubreytingar til að nýta sér veikleika FH-liðsins eða það sem honum finnst vera það. Og það bara misheppnast.“

„Við erum búnar að hrósa honum og Eddu (Garðarsdóttur, aðstoðarþjálfara) í allt sumar fyrir hvað þau eru búin að rúlla vel á liðinu og breytingarnar sem þau hafa verið að gera. Það hefur aldrei klikkað en ég set spurningarmerki við þennan tímapunkt. Af hverju breytir þú liðinu og kerfinu þínu eftir 4-0 sigur á móti Val?“

Umræðu Bestu markanna um leikinn og mögulegt svar við spurningunni hér að ofan má sjá í spilaranum hér að neðan.